Est mortu eriseru a mengianu, a is noi oras, candu fut trabagliendu in Isili, Robertu Usai de Biddanoa de Tulu, chi iat airi fatu bintidus annus su mesi ch’intrat. Nde dd’est orrutu unu machinariu chi umperaiat de tempus po fairi travis de ciumentu.
Imoi at essi su indagu de su procuradori Emanueli Secci a crariri comenti funt andadas is cosas de una stragi chi parit non tengiat acabu. Robertu trabagliaiat in sa “Demuro srl”, una sienda chi trabagliat cun su ciumentu chi s’agatat in sa zona industriali de “Perd’e Cuaddu” in Isili. Sa sola cosa chi si connoscit est ca su piciocheddu est stetiu boddiu intru de sa conca, is petorras e is brassus.
Unu sbagliu de Robertu o unu guastu tecnicu? Chini depit indagai at giai cumentzau de eriseru ascurtendu, a innantis de totu, is cumpangius de trabagliu chi ancora funt in turmenta. Is matessis cumpangius de Usai ant tzerriau inderetura su 118, a pustis s’incidenti, ma a dolumannu is agiudus no ant possiu fairi nudda, ca candu funt erribaus Robertu Usai fut giai mortu. In su logu de sa disgrassia funt erribaus is carabineris de sa Cumpangia d Isili, cumandaus de su capitanu Elias Riu. Su corpus de su piciocu est abarrau a intru de su capannoni finas a candu funt erribaus su magistrau e is tecnicus de su Spresal, chi trabagliat po sa seguresa in su mundu de su trabagliu. A pustis ddu ant fatu erribai a su Policlinicu de Pauli po s’autopsia.
Si torrat a alluiri sa chistioni in pissu de sa seguresa in su mundu de is trabagliadoris e su segretariu regionali de sa Cgil, Samueli Piddiu, chistionat de su tempus chi est passendu s’Italia: “Cussu chi bessit a campu est ca non si donat crobba manna po sarvai sa vida a chini trabagliat. Parit ca is meris, po cicai de torrai a godangiai a pustis sa serrada de su covid, bogliant torrai a partiri ponendu a un’ala su problema de sa seguresa. Ddu narant is numurus de is urtimus tempus: a erriscai de prus funt massimamenti is giovunus chi funt cumentzendu e is prus beciteddus chi non tenint prus is fortzas de unu tempus”.
No est giustu a morri de trabagliu e a bintidus annus ancora peus. Chi sa terra ti siat lebia Robertu.
Màuru Mura
Foto: https://www.occhioallasicurezza.it/sicurezza-sul-lavoro-che-cose-cosa-significa-sicurezza/
