Pretzius de macus po cust’istadi finas in Sardigna. Po s’urtima cica de Federconsumatori po una vacanza de una cida in d’unu logu de mari, una familia cun babbu, mama e dus pipius pagat pagu de mancu de ses mila eurus, su 19% in prus de ocannu passau.
Is aumentus funt po totu: viagiu, albergus, ristorantis, machina, parchegius e servitzius in is spiagias.
“Eus a disponimentu una prenda chena ogualis, ma non podeus garegiai cun nemus. Su pretziu de is biglietus de is aereus est cuatru bortas tanti: cun d’una cica de sa piataforma Skyscanner, pensedu a pigai un’aereu su 12 de austu e torrai a domu su 19 de su matessi mesi, si podit lompiri a pagai 835 eurus de Milano a Terranoa e 819 eurus de Roma a Terranoa etotu – narat Giorgi Vargiu de Adiconsum –. A pustis, Deus sarvit su turista chi bolit pigai una machina a nolegiu, e ddu depit fairi po fortza poita is corrieras e is trenus de s’Isula non funtzionant comenti si depit. Galu, pigaus a esempiu is costas de s’oristanesu: un’aposentu in d’unu b&b andat de 90 a 110 eurus. In d’unu barigeddu in su mari po unu pratu de pasta si pagat finas a 22 eurus. Su parchegiu mancu a ndi fueddai ca costat un’ogu”.
Faustu Mura, presidenti de Federalberghi Sud Sardigna, spiegat ca “is pretzius si funt artziaus e fut depius a is spesas prus mannas chi depeus tenni: is alimentaris funt crescius de su 40%, sa currenti de su 50% e po samunai s’orroba de su 50%. Sa sola bogi chi no est crescia est su stipendiu de is trabagliadoris”.
Màuru Mura
Mercuris, su doxi de Triulas de su 2023
Foto: https://www.grandangoloviaggi.com/2021/02/22/sardegna-le-spiagge-piu-belle/
