Vitoriu Sgarbi bessit subra de su palcu in su merì de arregodu po Francu Battiato, chi est mortu su 18 de maju passau, e sa genti chi fut in sìArena de Verona ddu at pigau a sulidus aici a forti chi su studiosu de arti nd’est depiu calai. Cun cussu finas Al Bano, chi non s’aspetaiat una cosa de aici de is “fan” de su Maistu sicilianu.

Est cantu sussediu martis a merì in “Invito al viaggio”, su cuncertu intregau a Battiato, in s’Arena de Verona. Alice, Fiorella Mannoia, Colapescie e Dimartinto, Eugeniu Finardi e Jovanotti: funt feti calencunu de is nominis chi funt erribaus po arregodai su Maistu. Nemus sciat ca ddue funt finas Sgarbi cun Al Bano, chi boliant saludai e arregodai cussus puru su cantanti sicilianu. A ddus tzerriai in pissu de palcu Umbertu Broccoli, chi at fatu su contacontus po totu su merì. Non serbiat atru a su pubricu, comenti funt bessius in pissu de palcu si funt intendias bogis mannas: “Fascista”, aboginaiat calencunu po Sgarbi. E galu: “Non ci fais nudda, baidindi, torranci a domu tua”.

A istentu Sgarbi ce dd’at fata a chistionai, ma is sulidus fun de averas fortis e medas, e a innantis de ndi calai at saludau sa sorri chi s’agataiat in mesu a sa genti: “Saludu sorri mia e custu mi bastat, e a cussus chi m’ofendint ddis nau de essiri allirgus”. A pustis chi at nau custus fueddus, su ferraresu, nd’est calau.

Sa matessi sorti est tocada a Al Bano, chi forsis tenit sa sola curpa de essiri pigau in palcu cun Sgarbi. Non sciat aunia si castiai su cantanti de Cellino San Marco e at cicau de brullai: “Chi soi innoi est curpa de Sgarbi. Ma sa cosa meglius chi possa fairi est a mi nd’andai comenti soi erribau”.

In segus Al Bano at chistionau cun is giornalis: “Deu e Sgarbi fustis in Abano, ddue fut un’atobiu aunia m’ant premiau. Acabada sa manifestada Sgarbi m’at nau: ‘Andaus a s’Arena de Verona, ddu est finas sorri mia”. Erribaus e s udiretori artisticu Giuannimarcu Mazzi nosi portat in palas de su palcu. Deu non sciau nudda e Vitorio ci cumbidat a bessiri cun cussu in pissu de palcu. Intraus e sa genti nosi pigat a sulidus e a bogis. Mi soi agatau spantau, ma apu pediu perdonu e ndi soi calau”.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

 

Foto: https://www.veronasera.it/eventi/invito-viaggio-franco-battiato-concerto-arena-verona-21-settembre-2021.html