Po cuatr’oras, mercuris a merì, s’editori Urbano Cairo, chi est finas presidenti de sa scuadra de fubalu de su Torino, at arrespustu a is preguntas de is magistraus de sa procura contras de sa mafia de Firenze chi ddu ant bofiu ascurtai comenti de testimongiu. S’indagu, po su cali est stetiu intendiu, est cussu de sa fotografia chi Sarbadori Baiardo, cussu chi agiudaiat is boss Graviano, iat airi amostau a Massimu Giletti. Si narat ca in si ddue biat Sirviu Berlusconi, su mafiosu Peppe Graviano e su generali Franciscu Delfino.
Po cussu chi si narat, Giletti, giai intendiu tres bortas de is publicus ministerus, iat airi arreconnotu, in s’imagini, Berlusconi. Sa coincidentzia est ca in su mentris chi Giletti provaiat a tenni sa fotografia de Baiardo e a cumentzai una trasmissioni noa po fueddai de chistionis de mafia, Cairo at serrau su programa televisivu.
Is procuradoris si funt frimaus meda propriu in custa chistioni, po cicai de cumprendiri chi Cairo connosciat s’esistentzia de custa fotografia. E finas poita iat airi pediu a Giletti de andai a chistionai cun Berlusconi, chi, a dogna manera Gileti etotu no at ascurtau. Prus in generali is preguntas si funt frimadas a totu cussu chi at portau a sa serrada de su programa.
Cairo, chi est presidenti e aministradori delegau de Rcs Media Group e presidenti de Cairo Communications, sociedadi aunia si ddeu agatat La7, fut stetiu cumbidau a chistionai in is cidas passadas, ma teniat cosa de fairi meda e at cicau un’atra dì aunia ddi podiat andai meglius.
Aici mercuris passau s’est presentua de is magistraus fiorentinus acumpangiau de dus abogaus, chi, a dogna modu, non ant assistiu a s’interrogatoriu poita s’editori, immoi, est unu testimongiu e cussu chi at nau est stetiu arregortu in d’unu verbali. Non si connoscint is arrespustas chi at donau Cairo.
Màuru Mura
Cenarba, su trinta de làmpadas de su 2023
Foto: https://www.agi.it/estero/news/2023-06-22/urbano-cairo-non-saro-nuovo-berlusconi-21937984/
