Sighit sa cuntierra intru de Christian Solinas, presidenti de sa Regioni, et Pàulu Truzzu, sindigu de Casteddu. E Truzzu, finas chi narat ca andant de acordiu, narat ca in calencuna chistioni dda pensant a s’imbessi.
Una est de seguru cussa chi pertocat su stadiu nou po su Casteddu, un’atra est cussu de su distinu de su Brotzu.
Po aunia fraigai su spidali nou, invecias, presidenti e sindigu, si tirant sa bocia unu cun s’atru. E chi eris Solinas, atobiendu is trabagliadoris de su Brotzu at nau ca sa Regioni non s’est posta de tressu e chi aspetat de su Cumunu un’indicu po cicai un’area, oi Truzzu arrespundit chi no ddu at mai donau poita sa Regioni non ddu at mai pediu.
“Deu non tengiu tempus de perdiri cun is provocheris – is fueddus de su sindigu – e asepetu de friargiu chi mi ddu pedant uficialmenti. Candu ant a pediri eus arrespundiri in d’una pariga de cidas”.
Po s’orrestu Truzzu acrarit cali funt is pensadas suas: “Apu sempiri nau ca soi a favori de unu spidali nou, aici comenti a potentziai su Brotzu e a su stadiu nou in Sant’Elia. Mi fait prageri meda ca finas su presidenti si ndi siat cunvintu”.
Ancora in pissu de su Brotzu, eriseru, chistionendu in dd’unu atobiu cun is giornalistas po amostai is servitzius nous intregaus a becius e disabilis: “Non si podit ponni in discussioni una ecellentzia po sa citadi de Casteddu e po totu s’Isula intrea. Duncas, agatu giustu a fraigai unu spidali nou, ma, a sa matessi ora ia bolli chi is spidalis chi giai trabagliant, iant essi potentziaus”.
Immoi sa bocia passat a sa Regioni, chi depit arregionai cun su Cumunu e cicai un’area aunia fraigai su spidali nou. Cussu chi parit est ca in Sant’Elia non si ddue agatit logu po s’unu, su spidali e po s’atru, su stadiu.
Ce dd’ant a fairi a si ponni de acordiu. Eus benni a biri… Bastat a si setziri.
Màuru Mura
Cenarba, su trinta de làmpadas de su 2023
Foto: https://it.wikipedia.org/wiki/Paolo_Truzzu
