Seus dus annus cumbatendu su coronavirus ma galu no est acabbau. Sighit sa genti a s’ammalaidai e sighit, a dolumannu, a si morri chena farta. In Sardigna in s’urtimu bulletinu difundiu de sa Regioni is impestaus funt abbasciaus ma is mortus funt crescius de meda.
Cun prus de 8.200 tamponis fatus su tassu de positividadi est de su 19,2%, difatis funt 1580 is impestaus nous, calaus duncas de is 1797 impestaus de sa di a innantis. De is nous quasi s’80% funt arresurtaus de is tampons antigenicus.
Sa genti ricoverada in is terapias intensivas funt dexi, unu in prus de s’atra dì e funt calaus de trexi cussus chi s’agatant in is atrus aposentus, immoi funt 260. S’abbasciat fins su numuru de is incungiaus in domu chi passant de 24.882 a 24.305.
A dolumannu teneus doxi mortus, contras feti unu de a di a innantis: dus omini de setantacincu e otantot’annus, chi biviant in sa citadi metropolitana de Casteddu, dus omnis de setantacuatru e otantot’annus de sa provincia de su Sud Sardigna, duas feminas de otantanoi e norantacinc’annus e dus ominis de setantadus e norantatres annus chi biviant in sa provincia de Nugoro, tres feminas de otantases, norantatres e norantacuatr’annus e un’omini de otantanoi, chi biviant in sa provincia de Aristanis.
In su fratempus funt 56.015 is impestaus nous in totu s’Italia po cussu chi narat su Ministeru de sa Saludi. Sa dì a innnantis funt “feti 17.155”. Is mortus funt bessius de setantacuatru a centucincuantotu. Sa percentuali intru de tamponis e malaidus nous est de su 15%.
Calat sa genti chi intrat in is uspidalis: in terapia intensiva funt 358, cincu de mancu e in is atrus aposentus funt 8.579, chi bolin nai 156 de mancu de s’atra dì.
In totu is impestaus funt 1.082.972 e de su cumentzu de sa pesta funt erribaus a 16.872.618 cun 164.731 mortus, e 15.624.915 sanaus.
11 de maju de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”
Foto: https://www.labaurelia.it/long-covid-e-post-covid/
