S’Inter de Pippo Inzaghi, a pustis dus annus, s’at a torrai a giogai sa finali de Champions League in Monaco de Baviera sabudu 31 de maju. Ancora non si connoscit sa scuadra chi at atobiai, poita custu meì s’ant a giogai sa finali s’Arsenal cun su Paris Saint Germain chi, in sa partida de unu, fut acabbada cun sa vitoria de is francesus po 0-1. Eris, in sa partida de dus, is nieddus e asulus ce dd’ant fata a binciri cun su Barcellona, a pustis de una partida maca comenti de pagas. Giai sa partida de unu, In Catalogna, fut stetia spantosa cun tres gol fatus giai de s’Inter e giai de su Barcellona. Ma cussa de eris, comenti de partida, est stetia anocra prus maca. Bastat a castiai comenti s’est amostada po chini dd’at castiada. S’Inter, dapoi de sa parti de unu, fut giai bincendu po 2-0 torrendu gratzias a innantis a Lautaro Martinez e in segus a Calhanoglu chi at fatu gol de is undixi metrus.
In sa parti de dus est imbucau un’atru Barcellona cunfroma, massimamenti, a cussu de sa parti de unu. E aici, is catalanus ant fatu dus gol in seti minutus cun Garcia, a su minutu de 54, e Dani Olmo, a su minutu se 61. E non bastat, poita candu sa partida fut acabbendu, est a nai a su minutu de 88, Raphinha at fatu gol- Chi non fessit de Acerbi, su difensori pretorianu de Inzaghi, sa partida fut acabbada aici. Ma, torrendu gratzias a su matessi Acerbi chi at fat uunu gol chi pariat fatu de un’atacanti, sa partida a pustis noranta minutus fut 3-3. Comenti in Barcellona e, po mori de custu, sa partida s’est depia allonghiai de dus tempus de cunidixi minutus cadunu. A s’acabbu est unu gol de Frattesi a arregalai sa finali de Monaco di Baviera. Ma ancora de prus de su gol de Frattesi funt is paradas de Sommer a acumpangiai sa scuadra de Inzaghi a su bisu prus mannu: binciri po sa bia de cuatru sa Copa cun is origas!
Màuru Mura
Mercuris, su seti de maju de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.calciomercato.com/news/inter-barcellona-live-alle-21-24220
