“A pustis dus annus de Covid e cincuxentus trabbagliadoris de mancu, chi ddue podiat essiri calencuna diferentzia ddu creu deu puru”. A chistionai est Pàulu Truzzu, finas a su binti de arbili passau sindigu de Casteddu chi arrespundit a Massimu Zedda chi sa cida passada iat nau de airi agatau una citadi in peus cunfroma a cussa chi iat agatatau de Delogu e Floris. “In pissu de certas cosasa eus fatu miraculus”, narat su caputruma de Fradis de s’Italia in Consigliu regionali, chistionendu cun Alissandra Carta in Radiolina, in sa trasmissioni “A tu per tu”. E sighit: “E bogliu torrai gratzias a is dipendentis chi ant sempiri garantiu su trabbagliu in dd’unu tempus dificili meda. Cantu at nau Zedda mi parit chi siat comenti de si spogliai de is responsabilidadis e cicai giustificatzionis po cantu, invecias, nau in sa campagna eletorali: di istat, ma nau ca finas a mei, diventendu sindigu, est sussediu de agatai calencuna cosa chi no andessit beni. Ma no apu nau nudda, apu trabbagliau chena morrungius”.
Truzzu, dapoi, s’est candidau a sa torrada regionali, aunia non ce dd’at fata a binciri sa cuntierra cun Alissandra Todde, finas poita at pigau votus pagus in sa matessi Casteddu, citadi de sa cali fut sindigu in carriga. “Non ce dda eus fata a spiegai a su meglius su trabbagliu e is sacrificius chi iaus fatu po migliorai sa citadi”, amitit. “Apu pigau Casteddu in su 2019 chi teniat centucorantaseti eurus de dinari investiu po dogna citadinu e dd’apu lassada in su 2023 cun 375: bolit nai ca est stetiu fatu unu trabbagliu mannus. No eus tentu crobba po is cosas piticas, pensendu a spendiri dinari. Poita non mi soi torrau a presentai in sa torrada comunali? No est chistioni de prestigiu personali: totu sa coalitzioni m’at pediu de mi ponni in giogu po is Regionalis e aici apu fatu”.
Màuru Mura
Mercuris su seixi de Santu Antine de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.ilgiornale.it/news/interni/paolo-truzzu-chi-e-2287271.html
