At essi Massimeddu Zedda, presidenti de is Progressistas sardus, su candidau a sindigu in Casteddu po is comunalis de s’otu e su noi de lampadas po su “Campu Largu” de su centrumanca, sa matessi coalitzioni chi at fatu binciri a Alissandra Todde is eletzionis regionalis de su binticincu de friargiu passau.

Su Partidu Democratigu, chi iat pediu unu pagu de tempus, eriseru a merì in domu sua in s’orruga Emilia, in Casteddu, s’est postu a dispositzioni e at acetau sa candidadura de Massimu Zedda, chi giai est stetiu, po ot’annus de su 20011 a su 2019, sindigu de sa capitali sarda. In su 2019 etotu iat decidiu de cicai de diventai presidenti de sa Regioni, si fut dimitiu, ma non ce dda iat fata contras de Christian Solinas.

Peruna duda, in pissu de Massimeddu, de parti de is Steddaus, s’Avs e totu is atras siglas de su Campu Largu. Sa mesa de relata, a cantu si narat, at finas bullau sa pensada de ammanniai su campu cun s’imbucamentu de is centristas.

Sighit, duncas, in s’Isula su caminu de su campu largu. Su nomini de Zedda fut giai in mesu de is chistionis de su mesi de gennargiu passau. Zedda etotu iat finas nau ca fut a dispositzioni chi calencunu boliat fairi is primarias po decidiri, ma s’alleantzia intru de su Partidu Democratigu cun is Steddaus, comenti po is regionalis, at sceberau su matessi caminu. Cumpartziu est a nai.

In Casteddu, duncas, at essi Massimu Zedda contras de Alissandra Zedda. A sfidai Massimu at essi difatis Alissandra, giai scioberada de tempus de sa coalitzioni de centrudrestra. Alissandra Zedda fut sa numuru dus de sa Giunta Solinas, is sa legisladura regionali passada, e finas assessora de su Trabagliu cun Fortza Italia e immoi s’agatat conadidada po cicai de diventai sa prima sindaga femina de sa citadi.

Non feti is Zeddas, ma a curriri po sa cadira prus manna de Casteddu c’at essi finas s’abogau Giusepu Farris, chi si presentat a is eletzionis cun dd’una lista civica.

 

Màuru Mura

 

 

 

Martis, su seixi de arbili de su 2024

 

 

Attività realizzata col contributo della Regione Sardegna – Imprentas 2023-2024. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://www.ansa.it/sardegna/notizie/2024/04/15/massimo-zedda-candidato-sindaco-del-centrosinistra-a-cagliari_10f1e2b5-3db0-44c0-b591-23a24c6dd661.html