A oras pagas de sa rebellia de Yegveny Prigozhin, capu de sa truma Wagner, funt is zonas prus de umbras de cussas de lugi po su cumentzu, su caminu fatu e su frimamentu de sa marcia de is wagneristas bia Mosca.

Cumentzendu, po sa stampa americana Washington e Vladimir Putin furint a connoscentzia de cussu chi fut sussedendu. InAmerica ndi funt a connoscentzia de mercuris passau e, po is responsabilis de sa siguresa natzionali de is Stadus unidus, s’arriolu prus mannu fut cussa de su distinu de is armas nuclearis russas chi cumentzaiat una guerra civili. Po su Washington Post “sonumancu sa dì a innantis” su matessi Putin iat tentu informatzionis de cussu chi iat essi sussediu de cussu chi si podit nai fut su brassu destru. No at fatu nudda su propriu.

Galu: in su messagiu aunia Prigozhin annuntziaiat ca torrada a palas beniat nau a literas craras ca “mancu unu stiddiu de sanguni fut fatu bessiri”. Po sa televisioni Ucraina Yuri Ignat, perou, sa Wagner, in sa marcia bia Mosca, at fatu orruiri ses elicoterus e unu aparechiu de s’esercitu russu cun d’unu numuru, chi non si connoscit, de pilotas mortus. Nova chi in Mosca non narant chi siat beridadi o faula.

De sa Wagner, invecias, non si tenint novas de mortus. Sa pigada de Rostos est stetia chena mortus o lantiaus e is primus atacus russus – faddius – funt lompius a s’artaria de sa citadi de Voronezh. Iant essi bastaus una pariga de bombardieris po abatiri is militzias. Funt prontus finas Ramzan Kadyrov cun is unidadis specialis cecenas a is ordinis sus: tremila sordaus prontus a fairi citiri sa rebellia giai in Rostov, iat nau su “pangheri” de Grozny. Ma su cumandu de intervenni, de Mosca, no est mai partiu.

Sa marcia de is wagneristas, ghiada forsis de su numuru dus de sa truma, Dmitry Utkin, est sighia finas a erribai a duxentus chilometrus de sa capitali de sa Russia. A pustis s’est frimada, si narat po erriciri rifornimentus. Fut invecias su tempus po fueddai.

 

 

 

Màuru Mura

 

 

Lunis, su 26 de làmpadas de su 2023

 

 

Foto: https://www.internazionale.it/notizie/benoit-vitkine/2023/06/24/wagner-rostov-putin