Sa Sardigna, totu intrea, calat in prassa, cun d’una manifestada manna, sabudu in Casteddu, po difendiri sa sanidadi pubrica e po morrungiai contras sa serrada de is spidalis chi giai funt obertus. Po sa prima borta, a calai in prassa, ant essi totu is cumitaus, unu a su costau de s’atru, lompendu aici a un’obietivu chi de tempus mannu totus s’aspetaiant. Agradessiu a totus. “Seus trabagliendu de annus medas”,narat Alisandru Rosa, unu de cussus deputaus a chistionai “po cicai de ponni totu paris is fortzas impignadas in Sardigna e po tenni feti una bogi. Totu paris est prus facili”.
Totus o cuasi, poita “Giù le mani dall’Ogliastra”, unu de is comitaus nascius a innanti de totus, po morrungiai po sa crisi de sa sanidadi pubrica, at decidiu de non calai in prassa, ca non cumpartzit s’obertura de sa manifestada a is sindigus: “In gennargiu”, provat a spiegai Rosa, “eus fatu connosciri una pensada a totu is trexentusetantaseti cumunus sardus po s’aprovatzioni de unu cumandu de sa dì in is consiglius comunalis in difesa de sa sanidadi pubrica: ci funt stetias aministratzionis medas chi ant portau custa pensada in is consiglius comunalis e sabudu ant essi in prassa cun nosu cincu sindigus chi ant a rapresentai totu is atrus”.
Sa manifestada de pusti cras, sabudu binticuatru de làmpadas, at a moviri a is noi oras e mesu de mengianu de prassa de is Centumila, cun sa truma chi at a lompiri finas a prassa Mortus de su Moby Prince. Unu morrungiu intendiu de tempus meda, chi s’est alluta ancora de prus a pustis de sa delibera de su primu de custu mesi po su pesamentu de cuatru spidalis nous in Sardigna, andendu aici a frimai is trabaglius de ristruturatzioni in cussus giai pesaus de diora: “Un’atzioni legia de averas, prus de cussu chi si creit”, narat un’atru deputau a chistionai, Franciscu Carta, “est una faddina chi non andat beni e po cussu eus decidiu custa manifestada de morrungiu”
Màuru Mura
Giobia, su 22 de làmpadas de su 2023
Foto: https://cgil.lecco.it/fp-tre-presidi-in-difesa-della-sanita-pubblica/
