S’Ucraina tenit abbisongiu mannus de atras armis americanas, missilis includius, po cicai de frimai is sordaus russus e is atacus de sa Crimea. Chi non lompint is armas “seus custrintus a nos arretirai”, narat chena girus de fueddus Volodymyr Zelensky a su Washington Post.
Is fueddus de su presidenti ucrainu funt po Joe Biden, ma ancora de prus po is deputaus republicanus de su Cungressu, chi sighint a tenni frimus is sessanta miliardus de agiudus militaris nous: “Su Cungressu americanu nos at fatu perdiri giai ses mesis”, sighit a nai Zelensky.
“Chi tenis abbisongiu de otumila corpus a sa dì po difendiri sa linia, ma ndi tenis feti duamila, depis fairi de mancu”, at spiegau su presidenti ucrainu, aciungendu finas: “chi non c’est s’agiudu de is Stadus Unidus, bolit nai ca non teneus peruna difesa arerea, missilis Patriot e atras milli armas”.
E dapoi ddue est sa chistioni manna de is Atacms, chi is americanus non bolint donai poita timint ca Kiev ddus umperit po atacai in is terras russas. E is americanus non bolint chi sa guerra intru de Ucraina e Russia si ndi pesit de prus.
Kiev castiat cun arriolu mannu is sordaus russus chi s’acostiant sempiri de prus. A pustis airi concuistau Avkivka, una de is citadis de su Donbass prus cuntendias, is russus ant torrau a pigai is atacus in su sud-est e in su nord, torrendu a donai una mirada finas a Kharvik. “Po nosi difendiri de sa Russia, teneus abbisongiu de prus armas, chi nde chi no nos arretiraus a bellu a bellu”, est s’avertentzia.
S’Ucraina, castiendu beni, est in dificultadi manna e Zelensky sighit a mudai is capus militaris. Est unu mudamentu de sighiu: is urtimus a ndi orruiri funt stetius su primu consiglieri de su presidenti Serhii Shefir e, dapoi Andriy Yermak. De calencuna dì at perdiu cumandu unu de is ominis prus potentis de Kiev, su Capu de su Consigliu de seguresa e difesa natzionali Valery Zaluzhy.
Màuru Mura
Sabudu, su trinta de martzu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.ansa.it/sito/notizie/mondo/europa/2023/11/11/zelensky-restituiremo-al-popolo-citta-e-villaggi-occupati_7d1dceab-741d-47b6-a89d-6ff7f0310cff.html
