Finas s’urtima dì aunia serbiat su numuru de 2/3 po fairi su presidenti nou de sa Repubblica de s’Italia si serrat, comenti si sciat giai, cun nudda, ma sa sì de eriseru, finas chi non est segura, podit tenni significu mannu. A partiri de is numurus de su votu de tres aunia is schedas arvas funt caladas de 527 a 412. Su presidenti Mattarella at pigau centubinticincu votus e Giudu Crosetto, de is Fradis de s’Italia, centucatodixi, chi funt cuasi duas bortas de is votus in poderi de su partidu de Giorgia Meloni. A pustis Crosetto agataus Pàulu Maddalena cun sessantunu votus sighiu, dapoi, de Pieru Ferdinandu Casini cun cincuantadus votus.

De custus numurus si cumprendit inderetura ca su centrudresta s’est dividiu: Fradis de Italia ant votau a Crosetto e is prus de sa Lega e de Fortza Italia invecias no ant scritu nudda.

A pustis chi is nominis fatus s’atra dì (Marcello Pera, Letitzia Moratti e Carrulu Nordio) chi no ant agatau s’allirghia de is atrus, eriseru s’at fatu caminu su nomini de sa presidenti de su Senau Elisabeta Alberti Casellati. Ma finas issa no at tentu su favori de su centrumanca. Giusepu Conte narat ca custu iat essi su sbagliu prus mannu de su centrudresta.

A pusti prangiu eribat una nova: Salvini est pensendu a Sabino Cassese, giurista, ma sa Lega narat ca funt totu faulas. “Podeus essiri acanta de fairi su presidenti nou – at nau su segretariu de is birdis – poderai allutus is telefoneddus ca podit essiri una noti longa. Non ce dda calu ca su Parlamentu est presoneri de su centrumanca ca tenit cosa de nai po dogna nomini chi feus!”.

Ma de oi at essi prus facili a agatai is numurus: bastant 505 votus. Po su segretariu de su Partidu Democratigu, Erricu Letta, at a serbiri sonumancu un’atra dì po fairi su presidenti nou. Su nomini de trabagliai beni est cussu de Casini ca su caminu po fairi a Draghi est prus trotu.

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

 

Foto: https://it.wikipedia.org/wiki/Palazzo_del_Quirinale