Dì innanti de eriseru si votaiat po is Regionalis, e duncas po fairi unu presidenti nou, in Molise. A bintu su centrudrestra, comenti unu pagu apetotu urtimamenti. A ghiai sa Regioni un’omini de Fortza Italia, su sindigu de Termoli Franciscu Roberti, chi at pigau prus o mancu su 61% de is votus e pigat su postu de su guvernadori chi ndi bessit, sempiri de Fortza Italia, Donato Toma. Su cuncurrenti de Roberti, Robertu Gravina, s’est inderetura amostau po fairi is cumplimentus.
Su partidu democratigu cun is steddaus si funt presentaus paris, ma abarrant atesu meda de sa pensada de binciri. Difatis, Robertu Gravina, chi est su sindidu steddau de Campobasso, abarrat frimu a su 37%. Mancu de chistionai de su de tres chi s’est presentau a sa carriga de guvernadori, Emilio Izzo chi rapresentaiat una lista civica, chi pigat su 1,6%.
Est a merì candu Gravina arreconnoscit sa vitoria de Roberti: “Apu mandau unu messagiu po fairi is augurius a Franciscu Roberti – at nau –. In s’atra colaitzioni ant fraigau un’alleantzia chi, probabilmenti, at funtzionau de prus. Po nosu est s’imbessi. Non tengiu atrus fueddus po chistionai de custa torrada eletorali poita sa vitoria de su centrudrestra est crara. Su progetu nostu, a dogna manera, depit andai a innantis, poita po mei est beni pensau”.
In su centrudreta sighit a pigai sempiri prus votus Fradis de Italia, e in su centrumanca, invecias, spantat is votus chi ant perdiu is steddaus. De arremonai ca in is urtimus annus fut su partidu prus votau de sa regioni Molise. A votai funt andaus sempiri prus in pagus, su 47,94% de cussus chi ddu podiant fairi, cunfroma a su 52,17% de sa torrada regionali de su 2018. Ma tandu si podiat votai feti in d’una dì.
“Intregaus sa vitoria in Molise e is numurus spantosus de Fortza Italia a su presidenti Berlusconi – at nau su numurus dus de su Guvernu e coordinadori de Fortza Italia, Antoni Tajani –. Una vitoria chi tocat a dda ligiri comenti fidi po su guvernu natzionali.
Màuru Mura
Martis, su bintotu de làmpadas de su 2023
Foto: https://www.open.online/2023/06/26/molise-elezioni-regionali-risultati/
