Unu pusti prangiu legiu po su Casteddu chi, po parti manna de sa partida, non ce dd’at fata a frimai su Como e una batosta po 3-1 chi non serrat sa chistioni de si sarvai. Ma non arriolat custu, ca sa cosa est segura. “Podiaus essiri prus bravus candu eus pigau su gol de unu e in su de dus eus ligiu mali sa situatzioni. Non fut facili, poita una difesa cun Obert e Palomino no dda iaus mai amostada. E depu nai ca, intru de is problemas, non funt andaus mancu mali”, is primus fueddus de s’allenadori casteddaiu.
Candu a Nicola benit pregotau chi abarrat finas ocannu chi benit, s’allenadori narat ca ancora non ci pensat: “Po mei cussu chi contat immoi est a portai a cumpimentu s’obietivu chi teniaus in custu campionau. Deu ddue soi ponendu totu cussu chi tengiu a intru, aici comenti funt fendu de su cumentzu de campionau totu is piciocus. Poi totu s’orrestu lompit a pustis: nosi dda eus giogada cun totus”.
Torrendu a sa partida de oi, po Nicola, mancari sa partida perdia, non totu est de ci scavulai: “Po comenti dda biu deu, eus fatu una parti de unu bona ca sa bocia dda eus fata girai beni. Depeus donai prus crobba a s’urtimu sceberu candu teneus sa bociae sa calidadi de acabbu de cussu chi ce dda feus a fairi. Est a nai ca feus gol pagus po totu cussu chi poneus in campu, ma de seguru non seus cuntentus”.
Su Casteddu, contras de s’Udinese sa cida passada e su Como in dì de oi, teniat duas partidas contras de duas scuadras chi non tenint nudda de nai. Ma no est serbiu a nudda poita dd’as at perdias ambas. Ma Nicola non pensat de airi facciu: “Chistionaus de duas scadras chi tenint calidadi arta e cun is calis nosi dda eus giogada chena timiri. Po mei a si sarvai no est un’arregalu chi ti faint, ma funt vitorias e paregius pigaus in campu. In prus de is partidas perdias chi lompint chena podiri nai nudda poita est aici! Chi andaus a castiai totu is campionaus passaus, est sussediu bias pagas chi po erribai a si sarvai non s’est sunfriu, nosu sigheus a gherrai, cumentzendu de sa partida benienti cun su Venetzia aunia eus a cicai de serrai su contu”.
Màuru Mura
Sabudu, su dexi de maju de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.youtube.com/watch?v=7NeMZm8X9rg
