Su binticuatru de martzu passau, cun dd’unu referendum bofiu de s’amministratzioni comunali e pediu de unu comitau “Po s’Ogliastra”, sa bidda de Seui est stetia cumbidada a nai sa sua po su scioberu de sa Provincia. In sa scheda ddue funt dus indicus: abarrai in sa citadi Metropolitana de Casteddu o torrai a cussa de s’Ogliastra, chi, ancora, est de arregodai, non s’agatat in umperu. Sa genti seuesa, in manera spantosa, est andada a votai in su Palatzu Comunali, aunia is consiglieris ant aprontau totu cussu chi abbisongiaiat.
Fut intendia meda, in sa bidda de sa Barbagia de Seulu, custa cuntierra e cussu chi nd’est bessiu a pigliu est craru che-i s’abba chi calat de Middai: in 481 ant scioberau s’Ogliastra, in 145 sa citadi Metropolitana de Casteddu e feti in tres ant torrau nudda.
Po cumprendiri s’importu de sa chistioni iat a tocai a castiai is numurus de cussus chi funt andaus a votai a is eletzionis regionalis passadas, 446, contras is 629 po su Referendum. Est totu unu spantu poita, est a nai puru, ca Seui tenit una relata manna cun sa capitali sarda, aunia bivit una comunidadi de trabagliadoris chi si perdit in is seculus. Aici at bofiu sa genti e cussu chi bolit sa genti depit essiri sempiri lei.
Eris, biora de is seti de merì, su sindigu Fabiu Moi at convocau su Consigliu Comunali po deliberai cantu est sussediu. E paris a is consiglieris funt lompius is citadinus e massimamenti cussus chi iant arregortu is firmas po pediri su referendum.
De s’Ogliastra, a festai, si funt amostaus cuasi totus is sindigus de is atras bintiduas biddas. Intru de custus Davidi Burchi de Lanusei, acumpangiau de atrus consiglieris, Marcellu Ladu de Tortolì, Sergiu Lorrai de Gairu, Angilu Stochino de Artzana, Giuanni Pedru Murru de Ilbono, Brunu Chillotti de Foghesu, Franciscu Usai de Ussassa, Christian Loddo de Talana e Alessiu Seoni de Biddamanna. Totus allirgus e cuntentus po s’imbucamentu de Seui in sa provincia benienti.
Dognunu chi s’agataiat in s’aposentu comunali, a pustis chi Fabiu Moi at ligiu sa delibera, at batiu is manus meda e cun fortza. Sa delibera etotu, po connoscentzia, at essi mandada a sa Presidenti de sa Regioni, a sa Giunta Regionali, a is Assessoris a is Enti localis, a us Presidenti de su Consigliu Regionali e a su Presidenti de sa Cumissioni Consiliari
Immoi est a aspetai sa spusta, ma sa volontadi de is seuesus non tenit peruna duda e depit essiri pigada in cunsideru.
Màuru Mura
Giobia, su cuatru de arbili de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: Ignazio Aresu
