Unu primu scioperu custu mengianu in Casteddu cun sa manifestada chi est partia a is dexi finas a mesudì indenanti de sa Confindustria Sardigna in s’orruga intregada a Cristolu Colombo, dapoi is scioperus ant essi in totu s’Isula, cun dd’una dì chi non ant a trabbagliai de aporntai po su mesi de cabudanni benienti. Est custu cussu chi nd’est beniu a pigliu de s’acordiu chi no est stetiu agatau in pissu de su cuntratu in su setori Industria Turismu chi est scadiu de giai ses annus.
“Is trabbagliantis e is trabbagliadoras chi garantint sa calidadi chi est beni sestau po sa provincia e po totu sa Sardigna – ant spiegau is segretarius territorialis de Casteddu Simoni Congiu de sa Filcams-Cgil, Giusepu Atzori de sa Fisascat Cisl e Cristianu Ardau de sa Uilitucs – non minescint s’indiferentzia cun sa cali s’atra parti si fuint po agatai unu acordiu chi tenit s’obietivu de tenni cunditzionis de vida meglius ca su poderi de compora est sempiri peus dogna dì”.
Funt seixi is oras de scioperu annuntziadas in totu s’Italia de Filcams, Fisascat e Uiltucs. Unu morrungiu mannu chi at a ponni in filera totu s’Italia e finas sa Sardigna in dis diversas. Oi est feti s’atobiu de unu, ma sa cuntierra at a sighiri “finas a candu Confindustria s’at a setziri in sa mesa e cumpartziri cussu chi pedeus, a partiri de su dinari: non fait prus, sa vida costat de prus e is trabbagliaroris pigant su matessi dinari!”, faint sciri is sindacaus.
“Po s’ora is atras partis iant a bolli fueddai de flessibilidadi, reperibilidadi e de atras chistionis ponendu a un’ala cussu chi est prus de importu po sa vida de is trabbagliadoris e de is trabbagliadoras. Seus indeanti de genti tzurpa e totu custu est unu disacatu po totu su setori”, narant Congiu, Atzori e Ardau, fendu sciri ca totu at andai a innanti finas a candu non ant essi ascurtadas is chistionis postas in campu.
Màuru Mura
Mercuris su seti de austu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://lentepubblica.it/cittadini-e-imprese/bonus-estate-lavoratori-del-turismo/
