Non si frimant in Bangladesh is morrungius contras de su guvernu: migliaias e migliaias funt is personis caladas in is orrugas e in is prassas. Ant giai nau ca no ant a obidiri po cantu pertocat is doveris insorus po cicai de ci bogai su primu Ministru Sheikh Hasina chi, in su mesi de gennargiu passau, est bessia a su poderi po sa borta de cuatru, finas chi is opositzionis no iant votau.
Su guvernu at amostau sa manu forti ponendu regulas noat comenti su negai is bessidas in su noti, su segamentu de internet, is gas chi faint prangiri e is proietilis de goma.
Ma sa cuntierra cun sa giustissia est de spantu mannu: is tumbadas intru de is unus, cun baculus e gorteddus, contras de is atrus, cun proietilis berus, ant lassau a terra prus de noranta mortus, sonmumancu po cussu chi narat s’agentzia indiana Pti, catodixi intru de is fortzas de s’ordini, s’orrestu intru de chini morrungiat. Centinaias de atras personis lantiadas. De candu funt cumentzaus is morrungius, est a nai de su cumentzu de su mesi de argiolas, funt prus de trexentus is mortus in Bangladesh.
Mannu, si contant in prus de deximila, cussus chi funt stetius acapiaus e intru de custu si ddue agatant finas ominis de importu mannu chi faint parti de s’opositzioni.
In dd’unu atobiu chi s’est tentu in is oras passadas in Dacca, Nahid Islam, unu de is capus de su movimentu de is studentis, at istigau sa genti nenduru ca in prus de is dimissionis de sa primu Ministru si depit fairi finas unu processu po sa genti morta e sa corrutzioni de is guvernantis.
Chini calat in prassa de cuasi unu mesi morrungiat massimamenti contras de sa decisioni chi una parti de is trabbaglius de s’amministratzioni pubrica depint essiri de is parentis de chini at cumbatiu sa guerra de Indipendentzia cumbatia de su Bangladesh contras de su Pakistan in su 1971. Sa parti manna de custas cuotas funt giai ridusias de una sententzia de sa Corti Arta, ma is studentis ant sighiu a morrungiai, pedendu giustitzia po is mortus e is lantiaus.
Màuru Mura
Lunis su cincu de austu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.today.it/mondo/bangladesh-morte-oltre-50-persone-proteste-antigovernative-4-agosto.html
