Su Casteddu est acanta meda a Folorunsho. Sa sociedadi de su presidenti Giulini e su Napoli (aunia Folorunsho est torrau a pustis chi de gennargiu passau at giogau cun sa Fiorentina) iant airi giai gatau s’acordiu po arregalai a Pisacane su giogadori de mesu campu, nasciu in su 1998 e chi at finas giogau in sa scuadra de sa Natzionali italiana.
Mancat s’acabbu e s’uficialidadi. Su giogadori brasilianu at a lompiri chena ddu pagai, ma chi su Casteddu ddu iat a bolli, ocannu chi beni, iat a tenni dogna diritu.
Si stesiat, invecias, Pitanu Esposito. Su Casteddu abarrat a castiai, ma est a nai ca su campionau spantosu chi at fatu Esposito in Empoli ddu at amostau a scuadras medas. E immoi si chistionat finas de is tedescus de su Borussia Monchengladbach comenti de scadra interessadas medas a is giogadas de s’atacanti napoletanu chi est de propriedadi de s’Inter. Po cantu pertocat is bessidas de su Casteddu, Scuffet, chi est torrau de Napoli, est acanta meda a diventai unu giogadori nou de su Pisa.
In su mentris, de sa Val Camonica aunia is piciocus de Fàbiu Pisacane funt trabbagliendu ben meda po su cumentzu de su campionau de sa Serie A de ocannu chi benit, at fueddau su numuru dus de s’allenadori casteddaiu, est a nai Giagu Murelli: “De su Casteddu una cosa, de sempiri, m’est pragia prus de is atras, est a nai s’unioni manna intru de totu is tifosus e sa scuadra. M’est sempiri pragia e immoi ca m’agatu innoi dda bogliu intendiri e tocai cun is manus”.
In su videu postu in Instagram, Murelli, nasciu in su 1964 in s’Emilia e chi po annus meda at trabbagliau, sempiri comenti de numuru dus, cun Stevini Pioli, chistionat de custu acapiu: “Est unu simbulu, poita su Casteddu non balit feti comenti de una citadi, ma est totu sa genit de un’Isula intrea”. E po sa matessi arregioni candu su Casteddu andat a giogai s’agatat “una responsabili manna e de importu po dogna giogadori e po nosu allenadoris”.
Màuru Mura
Giobia su dixiaseti de triulas de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://figc.it/it/nazionali/news/folorunsho-oltre-alla-scocca-c-%C3%A8-di-pi%C3%B9-un-anno-fa-era-impensabile-giocare-l-europeo-ma-non-ho-mai-smesso-di-sognare/
