Sa noti passada, biora de sa una de mengianu, est mortu David Sassoli, fut presidenti de su Parlamentu europeu e teniat sessantacinc’annus. De sa dì in fatu de Paschigedda s’agataiat in su spidali de Aviano, in sa provincia de Pordenone, po mori ca non ddi funtzionaiat, comenti iat essi depiu, su sistema imunitariu. Feti eriseru s’est scipiu ca non fut in saludi bona.

A contai is urtimas dis de vida est sa genti chi trabagliaiat cun cussu cun d’unu post in is social: “Si podit biviri e morri in maneras medas. David Sassoli at cumbatiu e trabagliau finas a s’urtimu”.

Giornalismu e politiga funt is campus chi at marrau Sassoli, a cuaddu de Firenze, Roma e Bruxelles, finas a diventai, in su 2019 presidenti de s’Europarlamentu.

Nasciu in Firenze in su 1956, at biviu meda tempus in Roma. Sa faci sua fut connota meda massiamenti po su trabagliu chi faiat: giornalista de su telegiornali de sa Rai. In sa Rai e totu est abarrau finas a su 2009 candu at decidiu de s’intregai in politiga. Cuatrucentumila votus iat pigau sa prima borta chi at cuncurriu, cun su partidu democratigu, a is eletzionis europeas.

Coiau e babbu de dus piciocus, biviat in Roma, ma comenti podiat si spostaiat in sa domu de Sutri, in sa Tuscia, aunia faiat cussu chi ddi pragiat prus de totu: giardinagiu e ligiri.

“Soi trista meda po sa morti de un’omini chi creiat in s’Europa. David Sassoli est stetiu unu giornalista mannu de averas e ateretantu at fatu comenti de presidenti de sa UE. Apu perdiu un’amigu, su pensamentu miu est po sa familia sua”, is fueddus de sa presidenti de sa Comissioni Europea, Ursula Von der Leyen.

“Mi intendu tristu a pustis sa nova mala de sa morti de David Sassoli – is fueddus de su presidenti de su Consigliu UE Charles Michel –. Fut un’omini chi creiat in s’Europa, nosi mancat giai de imoi s’umanidadi, sa generosidadi e s’errisu. Passientzias mannas a sa familia”.

 

Màuru Mura

 

Attività realizzata col contributo della Regione Sardegna – IMPRENTAS 2021-2022 LR 22/2018 art. 22”