“Ia bolli fairi intendiri cantu est tristu su coru de su guvernu, e su miu mascamente, po cussus chi funt mortus trabagliendu in is dis passadas e oi puru. Ant postu in dolu totu s’Italia. Mi intendu a su costau de totu is familias”. Aici su presidenti de su Consigliu Màriu Draghi, chi at ligiu is nominis de is trabagliadoris mortus. “Dogna dì de prus, parit una stragi”, at sighiu su presidenti.

“Tocat a si pensai calencuna cosa, giai a intru de sa cida ch’intrat, non si podit sighiri aici chena fairi nudda”, narat Draghi, a pustis airi torrau a arrepitiri is fueddus de su Presidenti de Confindustria Carrulu Bonomi poita “chini est in campu avertat inderetura chi ci funt cosas chi no andant”.

Su presidenti at torrau a nai comenti serbant “regulas prus seguras e penas prus tostadas, chena aspetai tempus meda, agiudus in is fabricas po biri is debilesas. Is trabagliadoris non funt responsabilis de nudda, at galu nau su capu de su guvernu, torrendu gratzias a s’agiudu de is sindacaus e cichendu de fairi cumprendiri ca tocat a ndi pesai sa chistioni de sa seguresa, chena ponni in mesu is operaius, ca non tenint peruna curpa.

Feti in sa dì de eriseru est de cuatru su numuru de is mortus in su mentri chi trabagliaiant. S’urtimu est un’omini de corantaset’annus chi nd’est orrutu de pissu de su pontegiu bolendu a terra de un’artaria manna a beru: undixi pianus! Un’atru muradori, in Brindisi, est mortu chi s’agataiat in su caminu candu nd’est orrutu pontegiu, unu corridoriu e una parti de sa bovida chi nde ddu ant boddiu in prenu: est mortu carragiau. Sempiri in Puglia, in sa provincia de Foggia, unu trabagliadori de is stradas, est stetiu postu a suta de unu tir in su mentris chi fut ponendu is segnalis po unu cantieri chi depit cumentzai lunis: teniat corantaset’annus e lassat una podidda cun dus figlius.

In Alto Adige, in sa zona de Merano, unu massaju de cincuant’annus est mortu in su mentris chi fut triulendu.

 

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

Foto: https://www.fanpage.it/attualita/biella-un-morto-sul-lavoro-47enne-travolto-da-una-catasta-di-materiale-del-peso-di-una-tonnellata/