Candu bosi narant ca in is biddas, massimamenti cussas piticas, non ddu at nudda de fairi e ca a ddue biviri est a perdiri tempus, frimaosì. Cicai, scorrovonai in sa “rete” e eis agatai spantus. Poita is biddas sighint a biviri. Bastat a tenni piciocus volenterosus chi intregant sa vida insoru a portai a innantis pensadas e progetus. Chi funt spantosus galu meglius. Cussu chi su sotziu culturali Kromatica, cun s’agiudu de su Cumunu, ant a apariciai de cenarba bintunu, de mesi de Orgiolas, fintzas a dominigu bintitres est unu de custus.

In sa maja de su biginau de Santu Giuanni, a costau de sa cresia, in cussa prassigedda chi s’incrarat a su padenti de Bregau, in Seui, bidda galana che pagus atras, torrat SeuInMusica. Est sa borta de otu, feti su Covid ddu at frimau. Si podit nai, chena farta peruna, ca est diventendu un’atobiu seguru po is amantiosus de “musica sperimentali”.

Cussu fini de cida in pissu de palcu s’ant a amostai artistas sardus e internatzionalis.

Su programa est unu machiori de averas. Feti po ndi cicai calencunu: is tres milanesus de “Ze in the Clouds”, chi lompint in Sardigna po sa borta de unu, paris a dus nominis nodius, Giuanniluca Pellerito cun Ricardu Oliva; Tanieli Ledda cun su progetu Clavius e sa truma King Howl chi erribat in Seui intru de mesu de unu “tour” in s’Italia e in s’Europa. Chena si ndi scaresciri de sa truma sarda de Syncopated City, de su rock de is Safir Nou, Tooker & Wazoo, Tum e Chicken Grease.

Po chini sighit custa musica funt nominis famaus e nodius.

At essi arregodau Luciu Dalla cun d’unu spetaculu tzerriau “Il mio nome è Lucio (un uomo come me)”.

In is tres dis de SeuInMusica s’at a fairi, in prus, una “masterclass” de improvisatzioni ghiada. Simone Grande si nd’at pigau s’incarrigu.

Is diretoris artisticus de s’atobiu seuesu funt Andria Sanna cun Luisu Murgia: “Eus cicau de abarrai in sa matessi ala de sa chistioni decidia ocannu: ‘Alter-nativi’. In su scioberu de is trumas eus donau importu mannu a sa musica prus originali, po nosu, castiendu in Sardigna e prus che a totu in s’orrestu de s’Italia”.

A su costau de SeuInMusica fintzas su cumunu de Seui, cun su sindigu nou, in carriga de unu mesi, Fabiu Moi: “Sa musica po is seuesus est identidadi. Non funt medas is biddas chi tenint una Banda Musicali de cent’annus. Est a sighiri in custu caminu, ca sa musica agiudat a castiai su mundu. SeuInMusica, de su cumentzu, at tentu sucessu mannu, e eus fairi de totu po fairi ammanniai custu festival”.

Aspetendu su bintunu sa bidda s’est bestia a nou e in is faciadas de is domus s’agatant cuadrus in biancu e nieddu, fatus de Luisu Murgia, chi amostant musicistas e genti seuesa chi at lassau arrastas mannas. E in is matessis dis de su festival s’artista seuesu Baroni Carboni nd’at a aciungiri atrus.

Musica, civargeddus, binu nieddu, aria bona, friscura e relatas intru de ominis de bona volontadi: custu est SeuInMusica.

A torrai gratzias a chini ddu portat a innantis cun sabidoria e sacrificius est sempiri pagu cosa. No est tempus perdiu a biviri in is biddas piticas. Ddu at totu, bastat a castiai cun is ogus dee su coru!

 

 

Màuru Mura

 

 

Cenarba, su seti de Triulas de su 2023

 

 

Imagini: Sotziu Culturali Kromatica