Su Casteddu saludat po sempiri (ma in su fubalu non si scit mai…) Sulemana e donat su beni beniu a is tres comporas noas, chi immoi funt uficialis, Adopo, Zortea e Piccoli.

Sa sociedadi de su presidenti Giulini, comenti benit scritu in su giassu arregodat “s’agiudu mannu” donau de Sulemana po permitiri a sa scuadra de si sarvai ocannu passau e ddi torrat gratzias po sa professionalidadi e po s’intregu e ddi fait augurius mannus po su sighimentu de sa carriera.

In segus, in su matessi giassu, passat a is tres comporas noas, partenduru de Zortea chi lompit in Casteddu cun dd’unu acordiu po is cuatru annus benientis, finas a su 30 de làmpadas de su 2028. “Zortea giogat comenti de laterali de difesa in sa parti destra de su campu – benit scritu – ma gratzias a sa cursa manna podit giogai in totu sa parti destra. A is miniscimentus de cursa aciungit tecnica bona e bit su giogu beni. Tenit grandu capassidadis de scartai e de agiudai is cumpangius cun passagius o de cicai cussu etotu su gol”.

Po Adopo, chi lompit in sa capitali sarda in prestidu, ma chi giogat beni su Casteddu ddu podit comporai in totu, s’aciungit “potentzia manna” in su centrucampu de sa scuadra. “Est postu beni in artaria, ca est mannu po unu metru e noranta cuasi. Adopo est unu centrucampista chi at moviu is primus passus in su Torinu e gratzia a is cualidas suas podit giogai in dogna logu de su mesu campu. Scit liai sa bocia a is atrus e de conca est unu spantu. A sa fortza fisica s’aciungit una tecnica bona e si scit fairi balliri finas in a innanti”.

Infinis Piccoli chi lompit, a sa matessi manera de Adopo, in prestidu chi est unu de is piciocus prus interessantis intru de is atacantis giovunus in Italia. Benint arregodaus is numurus: in norantaseti partidas giogadas in Serie A at fatu 13 gol e 12 funt is gol in corantases partidas giogadas cun is scuadras de is giovunus de s’Italia.

 

 

 

Màuru Mura

 

 

 

Giobia, su dixiotu de mesi de orgiolas de su 2024

 

 

Attività realizzata col contributo della Regione Sardegna – Imprentas 2023-2024. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://www.calciocasteddu.it/2024/07/17/ufficiale-michel-adopo-e-un-nuovo-giocatore-del-cagliari/