“De foras non podeis mancu pensai eita ci podit essiri a intru de unu presoni. Non si benit cuncediu nisciunu benefitziu, finas chi in medas tengiant is paperis in regula. Sa situatzioni est mali posta meda e a intru de is cellas seus postus comenti de animalis”.

Aici si ligit in d’una litara chena nomini, forsis scrita de unu presoneri cumunu e imbucada in is cascitas de sa posta de s’orruga de Sant’Apollinare e in su centru storigu de Tatari.

“Ddu est brutu apetotu, po non chistionai de is personis chi cicant de si bociri. Totu est postu mali, de is struturas a s’organizatzioni. Pedeus de fairi intendiri sa bogi nosta de disisperu: innoi non c’at nudda de educatzioni noa chi non seixentus personis fuliadas in is cellas chena fairi nudda totu sa dì”. E galu: “Custa no est rieducatzioni, ma est a cumbidai sa genti a si bociri. Seus muraus in vida”.

Intru de sa genti chi at erriciu sa litara finas Giuanniluisu Onida, de su comitau de cuartieri Latte Dolce e Santa Maria de Pisa. No at bidu chini dd’at posta in sa cascita de is litaras, ma connoscit beni meda su problema: “Boddu testimoniantzias de amigu e de pobiddas de presoneris e non si podit acetai chi non tengiant diritu a una butigliedda de abba”, narat, “Chini non tenit dinari non si podit intendiri custrintu a bufai de is grifonis de su presoni. Nemus narat de bolli un’albergu, ma de pagai is curpas cun dignidadi umana”.

Su matessi Onida sighit: “Su presoni depit cicai de torrai a cuberai vidas, aunia si podit. Depit essiri una possibilidadi po totu cussus chi ant a torrai a biviri in sa sociedadi cun su trabagliu o atras pensadas. Chi, perou, funt pagas o nudda”.

Sa litara acabat donendu apuntamentu a is citadinus, po cenarba su 27 de custu mesi, a is cincu e mesu de mericeddu, in Porta Sant’Antoni po una mostra de informatzionis in pissu de su presoni e sa possibilidadi de ascurtai calencuna testimonia de chini est stetiu presoneri.

 

 

Màuru Mura

 

Martis su 24 de mesi de talamini de su 2023

 

 

Foto:https://www.repubblica.it/cronaca/2023/04/15/news/telefoni_e_droga_in_carcere_a_sassari_agente_condannato_a_3_anni-396289895/