Fabritziu Corona est indagau po difamatzioni cun agraviu de sa Procura de Milanu a pustis is denuncias de s’atacanti de sa Roma Stephan El Shaarawy e de su giogadori de difesa de sa Latzio Nigolò Casale, ambos postus in mesu in sa chistioni de is scumissas, in is dis passadas, de su agenti de fotografias beciu in sa trasmissioni de Canale 5 Striscia la Notizia.

“Finas chi no est sa manera mia de biviri, cussa de mi ponni a s’atentzioni de sa genti, sa reatzioni mia, a is fueddus de Corona, non podit essiri che frima. Cussu chi est sussediu est stetiu, chena mesus fueddus, un’operatzioni de betamentu de ludu e sa cosa peus est chi parit totu fatu cun d’unu progetu”, at scritu El Sharaarawy in sa denuncia po difamatzioni cun agraviu presentada cenarba passada a sa Procura de Milanu de is abogaus cosa sua, chi funt Mateu Uslenghi cun Fideli Venturi Ferriolo.

“Mi depu tutelai deu, sa scuadra aunia giogu e finas su fubalu italianu – at spiegau ancora su giogadori groguorrubiu – ddu facu finas pota non sussedat mai prus”.

Po cantu pertocat Nigolò Casale, comenti at spiegau s’abogau Guidu Furgiele, “No at mai scumitiu in pissu de calencuna cosa de sportivu e non si podint donai nominis aici fendudeddu passa po cussu chi no est de parti de unu dellecuenti acertau, prontu a totu po s’amostai”.

Su dixiotu de custu mesi in Striscia la Notizia Corona iat chistionau de El Shaarawy, Casale e Fideli Gatti, giogadoris de sa Juventus . Po s’ora, in s’inchiesta de sa Procura de Torino, po cantu s’est scipiu in is urtimas dìs, funt indagaus po scumissas in logus illegalis feti Nigolò Fagioli giogadori sempiri de sa Juventus, Sandru Tonali, chi giogaiat finas a ocannu passau in su Milan e immoi s’agatat in Inghilterra cun su Newcastle e Nigolò Zaniolo, cussu puru in Inghilterra aunia difendit is coloris de s’Aston Villa. Nominis chi iat fatu Fabritziu Corona a innantis chi si fut scipiu de su indagu de sa porcura torinesa.

 

 

Màuru Mura

 

Martis su 24 de mesi de ladamini de su 2023

 

Foto: https://www.famigliacristiana.it/articolo/con-corona-la-rai-ha-fatto-un-pessimo-affare.aspx