Crescint cussus chi si vacinant contras de su Covid in Italia, finas chi su numuru artu est po mori de is pipius.

Funt custus is numurus chi benint a fora de su studiu de sa Fundatzioni Gimbe. In sa cida chi est andada de su tres a su noi de gennargiu de ocannu funt 483.512 is vacinaus nous chi in percentuali bolit nai +62,1% de is 298.253 de sa cida a innantis.

Sa pesada de custu numuru est massimamenti in s’edadi de is cincu a is undigi annus: 267.412 chi est su +53,3%) e cussa de s’idadi chi andat de is doxi a is dixianoi annus (61.778; +65,5).

Nova mala, po nosu de Làcanas, est su numuru de chini no at fatu mancu unu vacinu: 8,61 milionis e de custus 2,21 tenint prus de cincuant’annus cun erriscu mannu de maladia grai e intrada in su spidali.

Ant fatu is tres vacinus, finas a su 12 de gennargiu a is seti de mengianu, in 24.314.983 e sa percentuali est de su 61,5%, ma cun diferentzias mannas de is regionis: est a nai ca sa Sicilia est frima a su 53,4% e sa Valle D’Aosta, invecias, a su 70,5%.

Is provincias cun prus de duamila impestaus in pissu de centumila abitantis funt custas: Rimini (4469), Forlì-Cesena (3462), Ravenna (3382), Modena (3340), Firenze (3031), Lodi (3016), Monza e della Brianza (2858), Bologna (2806), Varese (2776), Trento (2774), Sondrio (2771), Brescia (2751), Reggio nell’Emilia (2722), Milano (2636), Prato (2625), Pisa (2615), Como (2596), Napoli (2584), Verbano-Cusio-Ossola (2575), Pavia (2567), La Spezia (2531), Pistoia (2529), Rovigo (2483), Aosta (2452), Lecco (2451), Caltanissetta (2435), Parma (2402), Verona (2390), Cremona (2389), Teramo (2385), Genova (2377), Savona (2349), Ferrara (2344), Chieti (2328), Lucca (2324), Bergamo (2320), Terni (2311), Mantova (2224), Arezzo (2222), Imperia (2206), Cuneo (2187), Piacenza (2173), Bolzano (2168), Biella (2163), Massa Carrara (2160), Vicenza (2133), Siena (2131), Livorno (2120), Pordenone (2105), Treviso (2082), Trieste (2071), Salerno (2047), Pescara (2041), Torino (2036), Caserta (2031) e Asti (2028).

 

 

13 de gennargiu de su 2022

 

 

Màuru Mura

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto:https://www.infovac.ch/it/infovac/attualita/951-vaccini-contro-covid-19-risultati-intermedi-sull-efficacia-e-sicurezza