Eriseru a merì in sa Fiera de Casteddu s’Ats e s’Assl ant aprontau un’atobiu po sa genti chi si boliat vacinai contras de su Coronavirus. Est andada beni meda ca, giai de is seti e mesu, ddue fut una surra de genti, non feti giovanus de is 12 a is 35 annus, chi furint cussus interessaus, ma familias intreas.

Comenti fut stetiu impromintiu ddue fut una dj e arregalaiant bratzalis aunia ddue fut scritu: “It’s open night, c’mon”.

“Est andada beni meda – narat Grabieli Mereu, chi est unu de is responsabilis de s’Ats-Assl – custa est una de is pensadas de s’Ats po cicai de fairi vacinai cantu prus genti. Ddu eus giai fatu, calencunu mesi a imoi, in Carbonia e Tortolì. Si funt acostiaus giovunus meda, ma non feti. Eus tentu genti de dogna idadi e seus cuntentus de comenti est andendu”. Non est arrennescia a amelessai custa pensada mancu sa “fake news” chi fueddaiat de unu chi si fut intendiu mali intru de is vacinaus e de sa serrada de un’Hub. Una faula manna!

In su fratempus in Sardigna eriseru funt 220 is impestaus nous in pissu de 3.276 tamponis. A dolu mannu tocat a prangiri atrus cuatru mortus: dus ominis de sessantotu e otantot’annus e una femina de centu e unu chi biviant totus in sa provincai de su Sud Sardigna e un’omini de setantacinc’annus chi biviat in sa citadi metropolitana de Casteddu.

Cussus chi s’agatant in sa terapia intensiva abarrant ogualis: bintiseti. Ma bessint de numuru, invecias, cussus chi funt in is atrus aposentus de is spidalis: cun is trexi chi funt intraus eriseru, imoi ndi teneus 240. Atrus 7.403 funt incungiaus in domu.

In s’orrestu de s’Italia agataus 5.278 impestaus nous e atrus setantunu mortus chi ddus faint bessiri, de su cumentzu de sa pesta in friargiu de ocannu passau, a 129.221.

Prus de cuatru milionis e mesu, invecias, funt cussus chi si funt amalaidaus.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

Foto: https://www.google.com/url?sa=i&url=https%3A%2F%2Fwww.postenews.it%2F2021%2F05%2F11%2Fvaccini-la-sardegna-aderisce-alla-piattaforma-di-poste-da-venerdi-14-si-prenotano-gli-over-50%2F&psig=AOvVaw1KYLVttAJNJQgq1SZlAB4O&ust=1630560025414000&source=images&cd=vfe&ved=0CAgQjRxqFwoTCICGgNCD3fICFQAAAAAdAAAAABAD