Cantu ant essi is giassus de s’Unesco in Spagna? Candu su primu, candu s’urtimu? Cicaus de arrespundiri a totu custas preguntas. Duncas, incumentzaus nendu ca sa Spagna est imbucada in sa cunventzioni in pissu de is prendas de s’umanidadi su cuatru de maju de su 1982. In su matess’annu, aici po passai de palu in frasca, s’Italia de Bearzot, s’11 de triulas, in Madrid binciat is mondialis de fubalu. E a Paolo Rossi cun Bruno Conti ancora si ddus arregodant in terra spagnola.
Torrendu a su semenau tocat a nai ca is giassus de sa Spagna iscritus in sa lista de is prendas de s’umanidadi funti corantanoi e atrus trinta funtiri is candidaduras po iscritzionis noas.
Is primus cincu giassus s’Unesco si ddus at intregaus in su 1984 e is atrus in is annus 1985, cun atrus cincu, 1986 cun cuatru giassus, unu invecias in is annus 1987, 1988, 1991, a pustis atrus tres in su 1993, unu in su 1994 e dus in su 1996. In su 1997 atrus cuatru, in su 1998 atrus dus comenti s’annu infatu. In su 2000 cincu, e dapoi in su 2001, 2003, 2006, 2007, 2009, 2010, 2011, 20112, 2016, 2017, 2018, 2019 e 2021 sempiri unu. Corantatres de custus giassus funt imbucaus po miniscimentus culturalis, cuatru, invecias, po meritus naturalis e dus amesturaus. Cuatru de custus giassus funti de cumpartziri cun atras natzionis.
Immoi non s’abarrat atru de ddus tzirmoniai totus e a pustis a ndi scioberai una pariga po ddu fairi connosciri unu pagu meglius. Si partit duncas cun sa Catedrali de Burgos e in segus teneus: Monasteru e giassu de s’Escorial, su Centru Storicu de Cordova, Alhambra-Generalife e Allbayzin, is operas de Antoni Gaudì, sa citadi ecia de Segovia e s’acuedoto, sa citadi ecia de Santiago de Compostela, sa citadi ecia de Avila cun is cresias suas a foras de is muras, is monumentus de Oviedo e de su Regnu de is Asturias, Sa ruta de Altamira e s’arti orrocada paleolitica de sa Spagna de susu, sa Citadi storica de Toledo, Su parcu natzionali de Garajonay, sa citadi ecia de Caceres, s’architetura Mudèjar de Aragona, sa catedrali, alcazar e Archivo de Indias de Siviglia, sa citadi ecia de Salamanca, su monasteru de Poblet, su paris archeologicu de Merida, Su Monasteru reali de Santa Maria in Gualdalupe, Is caminus de Santiagu de Compostela, su parcu natzionali de Dognana, Sa citadi storica murda de Cuenca, Sa Lonja de sa seda de Valencia, Las Medulas, Palau de la Musica Catalana e Spidali de Sant Pau in Barcellona, Monasterus de yuso e Suso de San Millan, Is pireneus, s’arti orrocada de su bacinu de su mediterraneu in sa penisola iberica, S’universidadi e distrtu storicu de Alalà de Henares, Ibiza, biodiversidadi e cultura, San Cristobal de La Laguna, is giassus archeologicus de Tarraco, Palmeto de Elche, is muras romanas de Lugo, is cresias romanicas catalanas de sa baddi de Boi, su giassu arceologicu de Atapuerca, su paesagiu culturali de Aranjues, is monumentus rinascimentalis de Ubeda e baeza, su ponti de Vizcaya, su parcu natzionali de su Teide, sa Torri de Ercole, is giassus de arti paleolitica in sa baddi del Coa, su paesagiu culturali de sa Sierra de Tramontana, Sa prenda de su Mercuriu de Almaden e Idria, su giassu dolmen de Antequera, is fagetas antigas de is Carpazi e de atras regionis de s’Europa, sa citadi califali de Medina Azahara, su paesagiu culturali de Risco Caido e is montis sacrus de is Grann Canarie e su Paseo de su Prado e Buen Retiro.
Màuru Mura
Sabudu, su catodixi de cabidanni de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://getbybus.com/it/blog/siti-unesco-in-spagna/
