Su giogadori de fubalu de s’Inter Lautaro Martinez est stetiu cundennau a pagai, de sa Setzioni Trabagliu de su Tribunali de milanu, po nc’airi stupau una castiadora de pipius de bintiset’annus imbestia de una maladia legia e morta a pustis mesis pagus.
Su licentziamentu, chi su giudici at nau ca non si podiat fairi, iat essi sussediu intru de su tempus de sa maladia de sa picioca, a pustis chi sa matessi iat erriciu de su spidali sa nova mala. Immoi su goleador argentinu at a depiri pagai sa familia de sa picioca, chi fut argentina che Lautaro e totu. Sa castiadora de pipius iat cumentzau a trabagliai feti otu mesis a innantis.
In pissu de custu contu, su campioni de su Mundu, at nau sa sua in is social: “Apu scioberau de abarrai citiu po totu custu tempus po rispetu de una familia chi non si dd’at pigada mai cun nosu. Ma non permitu a chinechisiat de tirai ludu a sa mia de familia”.
“Eus assumiu una personi giai malaida – at scritu in spagnolu in Instagram – un’amiga de una vida, finas a candu, a dolumannu, non at prus possiu trabagliai poita sa maladia non si ddu permitiat. A pustis airi fatu meda po issa e sa familia sua, paghendudeddi finas is biglietus de s’aparechiu po lompiri in Italia, agiudendudedda po agatai unu letu in su spidali candu fut posta mali de averas, agiudendudedda po is curas, cichendu logu po aposentai a sa familia chi eus depiu cunvinciri finas a benni po cicai de si pigai incarrigu de sa figlia chi fut morendusì, immoi seus in custa situatzioni”. Po su giogadori de s’Inter is parentis de sa picioca “ant aspetau chi sa figlia fessit in acabu de vida po cicai de otenni dinari de nosu”.
Sa sola cosa chi abarrat est una picioca, giovana meda, chi non s’agatat prus in su mundu. E una sententzia de su Giudici. Eus a benni a biri comenti acabat su contu.
Màuru Mura
Giobia su doxi de Santu Gaine de su 2023
Foto: https://www.sportitalia.com/primo-piano/inter-lautaro-condannato-dal-tribunale-di-milano-ecco-perche-47304
