Cuatru partidas perdias de sighiu, in Frosinone, in domu cun su Torinu, in Roma e cun sa Latzio in s’Unipol, chi bolint a su coru de is tifosus. Est sa bia de duas, in custu campionau chi su Casteddu at perdiu cuatru partidas una in fatu de s’atra. Fut giai sussediu intru sa giornada de cincu e de otu de su gironi de andada, ca tandu no iat fatu mancu unu puntu cun s’Atalanta, su Milan, sa Fiorentina e sa Roma. Est a nai ca tandu funt prus legias is partidas perdias, ca ancora ndi mancaiant medas. Immoi est unu pagu prus mannu s’arriolu.
Ranieri eris at ghiau un’allenamentu tostau meda chi at serrau cun dd’una partida intru de is piciocus. De su Crai Sport Center non si connoscit peruna nova de is ominis chi ant a cumentzai sa partida de dominigu a is tres de a pustis prangiu in Udine. At trabagliau cun s’orrestu de sa truma finas Sulemana, chi at cuberau a pustis chi si fut strupiau in sa partida cun su Torinu. Abarrant a foras invecias Hatzidiakos, Mancosu, Oristanio e Shomurodov, in prus de su scualificau Aresti.
Est de importu mannu sa partida de cras ca s’Udinese s’est stesiada de cuatru puntus in segus a su lunis spantosu candu at bintu contras de sa Juventus. Tocat immoi a nd’aprofitai ca is atras scuadras chi funt gherrendu po non ci calai in Serie B tenint totu partidas dificilis: su Frosinone cun sa Roma, su Verona cun sa Juventus, s’Empoli cun sa Fiorentina. Dificili chi facant puntus in cust’ora de campionau, poita is scuadras mannas non podint prus faddiri.
In sa partida de andada cun s’Udinese e totu fut stetia una partida legia de averas, ca is duas scuadras timiant a dda perdiri e po cussu no iant fortzau sa manu. Cras no at essi su matessi de seguru, ca tres puntus, po s’una o po s’atra, podint essiri de oru.
A innantis o a pustis una partida foras de domu tocat a dda binciri. Ant a lompiri dominigu is tres puntus? Sa spera est cussa.
Màuru Mura
Sabudu, su digiaseti de friargiu de su 2024
Attività realizzata col contributo della Regione Sardegna – Imprentas 2023-2024.
Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.dazn.com/it-IT/home/9wa3zlv6c56ftxhu3kkqc62hg
