Agiudus in dinari e agiudus socialis po chini trabagliar. Est cussu chi pedint is butegheris de s’orruga Dettori in Casteddu, su caminu de su biginau de sa Marina serrau de paricias dis poita is domus erriscant de ndi orruiri.
Ancora non si scit candu is butegas ant a podiri a oberri e famiglias medas si funt agatadas, de una dì a un’atra, chena stipendiu o cale chi siat intrada in dinari.
S’agitoriu ddu ant portau a connoscentzia eriseru a mengianu in s’atobiu cun is assessoris a is Attività produttive e a is Lavori pubblici, Alisandru Sorgia et Gabriella Deidda. Ddue funt a cust’atobiu finas is dirigentis de is lavori pubblici, attività produttive e protetzioni civili.
“Seus prontus a intervenni – at nau s’assessori Sorgia – ma tocat a ponni in contu chi su Cumunu non tenit a dispositzioni dinari meda, creu chi siat necessariu a tenni un’atobiu finas cun sa Regioni”. In pissu de sa chistioni de torrai a oberri su caminu: “Po s’ora non podeus sciri candu s’at a torrai a oberri, sa cida ch’intrat ant a cumentzai is trabaglius de ‘puntellamento’ de sa palatzina chi erriscat de prus”. Su sentidu, duncas, est ca is tempus, po torrai a oberri, ant essi longus meda.
Is butegheris, coidendu, ant a presentai una lista de is atividadis chi funt patendu e de su numuru de chini ddue trabagliat po cumprendiri chi si possant agiudai. “S’atobiu de oi – at acabbau de nai Sorgia – est stetiu de importu mannu po chistionai e acrariri is cosas. Sa chistioni abarrat oberta poita sa situatzioni est sempiri mudendu de ora in ora. Coidendu eus a tenni una riunioni straordinaria de Giunta po cicai de agatai solutzionis a custus problemas”.
Est a pensai de averas a totu cussus butegheris chi sunfrint immoi, a pustis ddu airi fatu cun sa pesta po dus annus. Sa spera est chi torrint a oberri a lestru, ad maiora…
Màuru Mura
Giobia, su 19 de gennargiu de su 2023
Foto: https://www.comune.cagliari.it/portale/page/it/palazzo_civico?contentId=LGO37219
