Non bincit, sa Torres, una partida chi pariat ddu podessit fairi. Iat essi stetia da seti de sighiu, invecias in Ancona acabbat cun dd’unu puntu po ambas is scuadras, cun is gol fatus in sa parti de dus de sa partida. A dogna manera est stetia una bella cuntierra, giogada beni de sa Torres, ma finas de s’Ancona. Unu de is meglius est stetiu Dametto, chi a innantis at fatu gol po is sassaresus e dapoi at sarvau in sa linia de sa porta sua unu tiru de Energe, a pustis chi is marghigianus iant agatau su gol de su paregiu cun Saco. Castiaus de prus acanta comenti est andada sa partida.
Interetura perigulosa sa Torres cun dd’unu tiru de Scotto sa parti manca de su campu, ma su portieri de s’Ancora non si fait spantai e ponidi is punnigosus. Sa Torres at poderau meda sa bocia, finas poita s’Ancona aspetaiat in palas. A pustis unu cuartu de ora bell’atzioni de is torresinus, de Ruocco sa bocia lompit a Zambataro chi provat de sa lacana de s’area de rigori, ma si perdit totu. Est a pustis de bintitres minutus chi sa Torres erriscat de segnai cun Mastinu, ma su portieri marchigianu no est de acordiu meda e fait una parada de spantu.
In sa parti de dus indetura una bocia chi passat de is peis de Idda a cussus de Ruocco. Ma s’Ancona ci scavulat totu foras. De su corrunconi de su campu tirat Giorico e Dametto cun dd’unu corpu de conca portat a innantis sa Torres. Parit cosa fata, finas poita is piciocus de Greco sighint a giogai beni e tenint ocasionis po fairi su gol de dus. Candu totutu pariat andendu beni, e a dapoi de dus giogadoris nous in campu, s’Ancona agatat su gol cun Saco, chi de conca cussu puru lassat Zaccagno a buca oberta. A s’acabbu ambas is scuadras erriscant de dda binciri: a su mindutu de otantacuatru Dametto sarvat in sa linia de porta e Scotto, de conca, mandat sa bocia a su costau de su palu.
Màuru Mura
Domingu su dixiaseti de martzu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.youtube.com/watch?v=wsWZG1IAiJA
