Su mundu de sa politiga e de is istitutzionis, italianas e europeas, at saludau a Giorgio Napolitano, su presidenti beciu de sa Republica italiana, mortu cenarba a norantot’annus de idadi.
Su interru de Stadu, cun cerimonia laica, s’est tentu in Montecitorio e a omagiai su duas bias Capu de Stadu, in prus de is carrigas prus artas de sa Republica, cumentzendu de Sergiu Mattarella, funt intervennius finas su presidenti francesu Emmanuel Macron e su presidenti federali tedescu Frank-Walter Steinmeier.
A pustis chi est lompiu su baulu, imboddiau de sa bandela italiana, in Montecitorio ant chistionau in medas po ddu arregodai. “Su Presidenti Napolitano at sempiri arregodau cun prageri is proprias arreiginis politigas e is valoris aunia at cretiu – at nau su presidenti de su Senau Ignatziu La Russa- Giorgio Napolitano est stetiu testimongiu de una cultura chi si fait politiga e de una cultura politiga chi si fait istitutzioni. De Capu de su Stadu at ghiau sa Natzioni arreconnoscendusì in cussus valoris chi funt is fundamentas de sa Carta Costitutzionali nosta. Certu, comenti totu is capus mannus, at tentu in sa cuntierra politiga, bataglias e cuntrastus finas tostaus”.
“Cun Napolitano si nd’andat una de is figuras prus de importu de sa storia de sa Republica”, at nau, invecias su Presidenti de sa Camera Larentu Fontana.
De prangiri finas is fueddus de sa genti de sa familia sua: “Babbu at acunsentiu su sacrificiu de s’allonghiamentu de is proprias responsabilidadis, a innantis de sighiri su impignu comenti de senadori a totu vida, amostenduru aici sa sensibilidadi de sa politiga e su rispetu a is istitutzionis”, at nau su figliu Giuliu.
“Giorgiu Napolitanu fut unu leader e unu politigu e un’omini spantosu e prenu de premura e atentzionis. Po nosu ci fut sempiri. Ascurtaiat is problemas chi teniaus in manera crara e cun amori, finas chi teniat atra cosa de fairi po s’Italia”, at nau sa figlia Sofia.
Napolitano est stetiu interrau in su campusantu acattolicu de Roma, aunia si pasat, intru de is atrus finas Antoni “Ninu” Gramsci.
Màuru Mura
Mercuris, su bintiseti de cabidanni de su 2023
Foto: https://www.ansa.it/sito/notizie/dirette_live/2023/09/26/i-funerali-di-stato-del-presidente-emerito-giorgio-napolitano_af8eef2b-2881-442d-b036-db5913cc3c17.html
