Chi non dde ddu iat boddiu un’ictus in su mentris chi fut chistionendu in Padova cras Erricu Berlinguer iat airi lompiu in cent’annus de idadi. Intru de totu is politicus de fatu de sa Guerra prus amau de sa genti e comenti testimonia de custu si podit castiai s’interru in Roma de su mesi de Làmpadas de su 1984. In medas no iant perdiu feti unu capu politigu, ma un’amigu, chi biant cun amiratzioni manna.

“Unu leader mannu, iat postu in sa pagina Prima s’Unioni Sarda; un’omini giustu, iat scritu su Manifesto. Unu simbulu chi ancora oi benit bistu cun tristura e dolu po una parti manca de su Parlamentu chi no esistit prus. Bofiu beni de is Cumpangius de su Partidu Comunista e castiau cun arrespetu, ateretantu mannu, de “is nemigus politigus”.

Omini bonu e riservau, ma a su matessi tempus barrosu e orgogliosu. Finas de sa Sardigna chi intendiat comenti sa propria terra, chi no at mai scaresciu passendu prus sa vida sua in Roma che innoi. Pagus mesi a innantis de si morri iat bisitau is minadoris de su Sulcis e is operaius de Portotorres, is massajus e is pastoris.

Unu de is politigus sardus de prus importu mannu chi ant donau lustru e fama a sa terra nostra, partendu de Antoni Gramsci.

Berlinguer fut nasciu in Tatari, su 25 de maju de su 1922, su babbu fut abogau, e sa familia sua fut una de cussas chi contaiat de prus e de sempiri antifacista. Curiosidadi est ca sa mama Mariucia Loriga fut sorresta de Franciscu Cossiga, e duncas Berlinguer ddi beniat nebodi: facili chi intru de is dus si chistionaiant in sardu puru, comenti giai iant fatu in parlamentu Lussu cun Gramsci, a cussu chi nos at portau a testimonia Nereide Rudas.

Si iscrit a su PCI in su 1943 e inderetura ndi movit sa citadina tataresa a una rivolta chi ddu faint acapiai poderendudeddu po tres mesis in su presoni de Santu Serbestianu. De totu sa vida politiga ant essi prenus is giornalis in custas dis, a nosu pragit arregodai un’omini chi baliat a sa sola cantu totu su Parlamentu intreu chi teneus oi.

 

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

 

Foto: https://www.ilriformista.it/cicchitto-sbaglia-enrico-berlinguer-non-era-un-giustizialista-266177/