Galu una partida perdia a tesu de domu e galu gol medas pigaus po su Casteddu, chi ndi torrat cun dd’unu grai 4-0 po sa scuadra de De Rossi.
Po sa partida de eriseru a merì Claudiu Ranieri iat pensau a totu un’atra cosa chi est mudau candu at pigau su gol de unu de Pellegrini: “Est sartau totu cussu chi iau decidiu, a pustis sa Roma at fatu cumprendiri de essiri prus forti meda de su Casteddu. Brava sa Roma, ma nosu depeus cambiai: una scuadra chi si depit sarvai depit ponni in campu atras armas e fairi de prus”, is fueddus de s’allenadori a s’acabbu de sa partida.
Comenti est sussediu prus de una bia in custu campionau, su Casteddu at sunfriu meda is tirus a giogu frimu: “Eus pigau, in is partidas giai giogadas, gol meda comenti cussus de custu merì. Chi fustis 0-0 podiaus arriolai sa Roma, ma non ce dda eus fata, miniscimentu mannu de sa scuadra de De Rossi, pagu de nai. Fustis currendu mali, finas po mori de sa calidadi de is giogadoris insoru chi agataiant sempiri dus ominis libertus. Iau postu a castiai sa mesu campu tres giogadoris, in prus de atrus tres de sa difesa e is dus de s’atacu. Si creiat ca cun otu giogadoris aici podiat essiri un’atra, invecias issus faiant girai beni meda, e a sa lestra, sa bocia”. Pagus fueddus po airi torrau a agatai De Rossi, un’annu a pustis s apartida Casteddu-Spal, tandu allenada de De Rossi etotu: “Est bravu, at pigau una scuadra forti e dda est fendu giogai beni. Immoi po issu at cumentzai atra cosa, dd’auguru dogna beni po su benidori”.
Immoi tocat a ndi torrai a abuddai sa conca. Feti una partida binta in is urtimas otu, ma Ranieri non si chesciat: “is piciocus trabagliant meda, giai ddu sciaus ca iat essi stetia tostada, ma aici est prus tostada de cantu pensiaus ca pigaus gol medas po curpa nosta. E aici no andat beni po nudda”. Sabudu lompit in Casteddu s’atra scuadra de sa Capitali: “Depeus cicai de fairi puntus a inanntis cun sa Latzio e dapoi cun su Napoli. Ddu scieus ca ant essi duas partids dificilis meda, ma nosi dda depeus gherrai”.
Màuru Mura
Martis, su ses de friargiu de su 2024
Attività realizzata col contributo della Regione Sardegna – Imprentas 2023-2024.
Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.youtube.com/watch?v=_puUJkSRXtU
