Unu dolu mannu, beru, a sa citia, cun sa cresia de ruga de Palestrina, in Cuartu prena a cucuru po s’interru de Toninu Dessì. Is parentis – sa pobidda Rossana, paris a is figlius Perdu e Franciscu, is sorris Anna Maria cun Luciana, e sa mama Teresina chi at pregau a sa stesiada – amigus medas, politigus de su logu e regionalis, e sa genti chi teniat in cura, chi galu non ci creint. Totu ant bofiu essiri eriseru a mengianu a saludai po s’urtima borta Toninu Dessì, mortu candu nemus si ddu aspetaiat, dominigu passau a feti sessantatres annus. Dessì est stetiu consiglieri comunali in Cuartu po tempus meda e at fatu finas su Presidenti de su Consigliu comunali, a is tempus cun Alleanza Natzionali e in is urtimus tempus fut dirigenti citadinu cun Fradis de Italia. Massimamenti, a dogna modu, est arregodau comenti de dotori de is familias in Cuartu e totu.

In is primus bancus totu sa genti de s’areu, is amigus e is politigus. Is cumpangius de partidu, su sindigu de Casteddu Pàulu Truzzu, su deputau de FdI Sarbadori Deidda, s’assessori Marcu Porcu, su consiglieri regionali Faustu Piga, paris a unu de is capus cuartesus de su partidu Migheli Pisano, chi po s’ocassioni at bestiu sa fascia in tres coloris de su sindigu. A su costau insoru su sindigu de Cuartu Gratzianu Milia cun sa presidenti de su Consigliu Rita Murgioni, totus cumovius indenanti a su baulu de su dotori e politigu.

“Toninu at tentu una vida errica meda, cun arregalus mannus ma finas cun fatiga meda”, is fueddus de su predi, de sa cresia intregada a Santu Stevini, Giuliu Madeddu, intru de mesu de sa missa. “Sa genti meda chi est oi in cresia bolit nai ca Toninu est stetiu un’omini bonu e beni bofiu de totus”.

Una tzirimonia chi at tocau su coru de totus e acabbada cun batidus de manus chi ant acumpangiau sa bessida de su baulu de sa cresia, po s’urtimu viagiu de Dessì bia su campusantu. “Nos eus torrai a biri”, is fueddus de su deputau Sarbadori Deidda, “Cun s’impromintza de fairi de totu po non ti deludiri mai”.

 

 

Màuru Mura

 

 

Mercuris, su bintidus de martzu de su 2023

 

 

Foto: https://www.comune.quartu.ca.it/amministrazione/luoghi/1104-quartusantelena/5663-cimitero-comunale