Nasciu in Santu Engiu su 22 de mesi de talamini de su 1952, Arrenatu Copparoni at cumentzau a giogai giai de piciocheddu in su Casteddu, aunia si nd’est pesau tentendu a innantis de sei portieris fortis e famaus comenti de Erricu Albertosi e Adrainu Reginato. Teniat feti bint’annus candu at giogau sa partida de unu in serie A, su 13 de maju de su 1973 contras de su Torinu. S’annu infatu Reginato at acabbau de giogai e Albertosi est andau a su Milan, ma su Caseddu at sceberau comenti de portieri a William Vecchi e Copparoni est torrau a si setziri in panchina. Candu Vecchi s’est strupiau Arrenatu at pigau su postu intru de is palus, ma cussu campionau po su Casteddu fut acabbau mali de averas cun s’urtimu postu in classifica. S’annu in segus, a dogna manera, Copparoni at agiudau a portai su Casteddu a is partidas contras de Pescara e Atalanta chi serbiant po torrai in Serie A. Ma sa cosa no fut andada beni.

In su 1978-79, Gigi Radice, chi giai ddu connosciat, dd’at cunvintu a torrai in Serie A  cun su Torinu po fairi su portieri de riserva in sa scuadra manna de Torinu. S’est setziu po annus meda in sa panchina fendu de riserva a innantis a Giulianu Terraneu e dapoi a Sirvanu Martina. In cuatr’annu at giogau feti cuatru partidas, ma in su campionau 1985-86, candu fut giai mannitu, po mori de unu infortuniu de Martina at cumentzau a giogai sempiri de prus e a s’acabbu de su campionau est calau in campu po 21 bias, cun s’agradessimentu mannu de airi parau, po sa borta de unu in Italia, unu rigori a Diegu Armandu Maradona. Fut su 2 de martzu de su 1986.

Bendiu Martina a sa Latzio, su Torinu at prefergiu a pigai su portieri de s’Inter Fabritziu Lorieri, ma Copparoni cuss’annu e totu de dd’at fata su matessi a si pigai soddisfatzionis galanas, comenti is partidas, a trintacinc’annus lompius, in Coppa UEFA. At acabbau de giogai in su 1988 e de tandu at cumentzau una carriera de scolas de fubalu e de portieris.

 

 

 

Màuru Mura

 

 

Sabudu, su bintitres de mesi de Idas de su 2023

 

 

Attività realizzata col contributo della Regione Sardegna – Imprentas 2023-2024.

Legge Regionale 22/2018

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://www.guerinsportivo.it/news/il-cuoio/portieri-nostalgia/2022/10/27-5849015/renato_copparoni_il_primo_portiere_italiano_a_parare_un_rigore_a_maradona