Chi no iat fatu cussu chi at fatu de Cristian Bunino in pagus s’ant essi arregodaus po is calidadis de giogadori de fubalu. No est a nai ca non siat capassu, ma de seguru non podeus nai ca est famau po unu corpu de conca, unu tiru cun su pei mancosu o po unu “dribbling” beni arrennesciu. Podeus nai ca iat essi abarrau unu de is medas chi de annu in annua t pistau is campus de sa serie C. Cristian giogat cun su Lecco, citadi de sa Lombardia, bofia beni meda de Alissandru Manzoni.
Ma eita at cumbinau custu piciocu de bintiset’annus chi po arti fait s’atacanti? Nudda de spantosu, po caridadi, ma de seguru una cosa chi, forsis, non si fut mai bista.
In Piacenza, in su stadiu Garilli, dominigu passau, si nc’est fatu bogai de su campu a innantis de cumentzai sa partida intru de Piacenza e Lecco po airi pisciau in is orus de su campu. In d’unu logu cuau, est a nai, ma a s’amostai a is duamila personis chi funt setzius po si gosai sa partida, a s’arbitru est partu feu meda e cosa de maleducaus. Tandu at decidiu de ci ddu bogai e non ddi fairi cumentzai mancu sa partida.
Sa cuntierra intru de is duas scuadras est una de cussas de importu mannu po su campionau. A unu cuartu de ora de s’acabbu, candu manc’una de is duas scuadras iat fatu gol, Lucianu Foschi, allenadori de is lombardus chi connosceus beni in Sardigna po airi giogau e allenau su Terranoa po annus medas, a innantis in serie D e a pustis in C2, pigat sa decisioni de fairi imbucai un’atru atacanti po cicai de binciri sa partida. Bunino, piemontesu de Pinerolo, cumentzat a si caglientai ca cumprendidi ca coidendu iat airi giogau.
Totu paris, de su logu aunia si fut caglientendu, andat bia sa Curva Sud, in palas de sa porta de su Lecco e atacau de totus, est a nai sa beridadi, si ponit a pisciai, aunia creiat de non s’amostai a sa genti.
Ma a innantis su guardialinee e a pustis s’arbitru decidint de non si dda fairi passai e decidint de ce ddu bogai ancora prima de imbucai in campu. Immoi s’ata pigai una scaulifica de una partida. Foschi non morrungiat: “Funti is regulas e andant postas in contu, a dogna contu Bunino no at ofendiu a nemus e, forsis, s’arbitru ddu depiat cumprendiri”.

 

Màuru Mura

 

Mercuris, su bintidus de martzu de su 2023

 

Foto: https://www.gazzetta.it/Calcio/altri-campionati/19-03-2023/bunino-lecco-fa-pipi-bordocampo-prima-entrare-espulso-arbitro-460746292078.shtml