Mancant, a s’acabbu de su campionau de ocannu, feti ses partidas e su Casteddu partit cun ses puntus in prus de su Lecce e sa Cremonese, chi cun 27 puntus funt agoa de is sardus. Est a nai finas ca su Casteddu oi, in su stadiu de Milanu intregau a Giusepu Meazza, atobiat s’Inter de Chivu, chi ghiat sa classifica. Su speru est a ndi torrai cun calencunu puntu, ma at essi dificili meda ca sa scuadra niedda e asula est forti meda de averas. Sa Cremonese de Giampaolo cun su Lecce de Di Francesco (ambos, in su tempus passau, funt allenadoris de su Casteddu) si dda giogant cun su Torinu de D’Aversa e sa Fiorentina de Vanoli. Facili chi su Casteddu s’agatit feti cun tres puntus in prus de is duas scuadras chi, paris a is sardus etotu, si dda funt gherrendu po non ce dd’acabbai in sa serie B.
De immoi in sus ant essi, massimamenti custas tres scuadras a si dda giogai in sa cuntierra po non ci calai e dogna giorronada de campionau at essi acumpangiada de bonas e malas. Su Casteddu immoi tenit tres partidas dificilis ca atobiat in filera Inter, Atalanta e Bologna. Ma chi Casteddu prangit, Lecce e Cremona non podint erriri, ca dogna partida podit atacai dificultadis mannas po totus. Funt casteddus fraigaus in aria? Eus a benni a biri.
In su fratempus po sa partida de custu merì in Milanu, s’allenadori casteddaiu Fàbiu Pisacane at lamau custus giogadoris: Caprile, Palestra, Adopo, Kilicsoy, Gaetano, Sherri, Deiola, J. Rodriguez, Raterink, Belotti, Albarracin, Dossena, Ciocci, Sulemana, Mina, Liteta, Zappa, Borrelli, Mendy, Ze Pedro, Obert, Trepy, Folorunsho, S. Esposito.
Mancant feti Idrissi cun Felici chi ant giai acabbau de giogai po ocannu, po mori chi si funt strupiaus giai de unu bonu pagu e Pavoletti et Mazzitelli chi non ce dd’ant fata a cuberai.
