Familias sardas arrabiadas po is pretzius chi si pesant po podiri sighiri a biviri. A is pretzius de is bulletas, de sa cosa de papai e de totu s’orrestu chi serbit in sa vida de dogna dì s’aciungit cussu po comporai is librus de scola po chini tenit figlius chi dde andant. Problema intendiu, massimamenti, de cussas familias chi tenint feti un’intrada chi cicant de s’arrangiai andenduru a castiai aunia si bendint librus giai umperaus o si castiant in internet aspetenduru s’ocasioni.
Po sarvai su problema e agiudai is familias chi non si ddu podint permitiri sa scola de s’obrigu iat depiri donai, po si ddus fairi in segus torrai, is librus coidendu, ma babus e mamas medas si chesciant ca scolas medas non ddu ant fatu.
Andendu a castiai beni est de seguru ca sa spesa po sustenni s’istrutzioni est una de is bogis chi faint a timiri de prus is familias sardas. Po unu piciocheddu de is scolas medias sa spesa po comporai is librus est, prus o mancu, de trexentus eurus, cincu eurus de prus de ocannu passau. Is librus chi costant de prus funt cussus de Educatzioni musicali, 37 eurus e 50, Arti e Imagini, 30 eurus e coranta, Matematica, 26 e cincuanta, sa gramatica e s’antologia de italianu, prus o mancu bintiseti eurus cadunu.
Bessit de bona manera sa spesa finas po unu discienti de is liceus cun una media de 360 eurus po cussus chi andant a su Scientificu e a su Classicu. Su libru umperau po su disegnu benit a costai 26,30, cussu de fisica 20, e si lompit a cuasi trinta eurus po su libru de ingresu. Prus de cincuanta eurus po is tres librus de italianu, 36 eurusu po cussu de latinu a su Scientificu, cuasi sessanta po is tres librus de grecu po su Classicu. Cincuanta po is librus de matematica e algebra, 36,50 po Storia de s’Arti, coranta po Chimica e Geografia astronomica, 23,20 po educatzione fisica, e trinta po Storia e Geografia: in totu 363 po su Scientificu e 361 po su Classicu.
A custus si depint aciungiri is pretzius de is ditzionarius de Latinu po su Scientificu e de grecu po su Classicu, chi depit comporai fintzas cussu de Latinu.
Castiendu is pretzius est seguru ca is familias cicant de s’arrangiai comenti podint!
Màuru Mura
Mercuris, su cincu de Mesi de ladamini de su 2022
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22
Foto: https://www.ecodibergamo.it/stories/bergamo-citta/confesercenti-testi-scolastici-flop-distribuzione-molti-studenti-senza-libri_1407190_11/
