De sa nova chi scrieus oi, catodixi de gennargiu, si podit cumprendiri ca in su mundu de su trabagliu seus totus ogualis, ma chini castiat sa vida cun ogus atentus giai scit ca aici no est.

Sa neta de su “rei de is puddas” Francisca Amadori est stetia bogada de su trabagliu de sa sienda de su nannai. Issa no abarrat muda e cun is manus in is manus: “Unu scioberu chena perunu motivu!”, narat. Sa nova dda fata connosciri su giornali emilianu “Il Resto del Carlino” e no est una faula ca ant nau ca est beridadi sa neta e sa sienda puru.

Po annus meda Francisca Amadori est stetia sa responsabili de sa comunicatzioni de sa sienda de Cesena e presidenti de “Romagna Iniziative”, chi riunit totu is industrias chi balint de su territoriu in Romagna, tra cussas finas sa sienda de familia.

Martis a mengianu, po arregionis chi galu non si connoscint, a Francisca ddi ant donau sa litara de licentziamentu e ce dd’ant stupada inderetura. Su consortziu Gesco de sa truma Amadori at fatu sciri ca “is arregionis funt de regula de sa politiga aziendalis e custas regulas balint po totu is trabagliadoris, chena peruna distintzioni: funt totu ogualis po nosu cussus chi trabagliant innoi”.

Est de arregodai ca su presidenti de Amadori est su babbu de Francisca, Fulviu e c agiai de tempus curriat bogi ca, professionalmenti, no andaiant de acordiu.

“Depu nai ca in 18 annus de trabagliu in sa sienda de familia – at nau Francisca Amadori a su Corriere de Bologna – apu sempiri fatu su doveri miu in is interessus de sa sienda e totu. E non feti, ma apu fatu totu cun amori, massimamenti po nannai miu Franciscu. Imoi soi biendu chi ponni calencunu abogau e cicai de difendiri su postu de trabagliu, poita deu non soi andada contras peruna regula”.

Sa Amadori est una realtadi famada meda in Italia e dda iant fata partiri Franciscu Amadori, chi est erribau a otantanoi annus e su fradi Arnaldo, mortu in su 2017 a otantadus annus. In su 2020 at faturau 1,2 miliardus de eurus e tenit 8.500 trabagliadoris.

 

 

14 de gennargiu de su 2022

 

 

Màuru Mura

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto: https://www.wecanjob.it/archivio6_lavorare-industria-alimentare-amadori-cerca-personale_0_7149.html