Is benzinajus non torrant agoa. Is distribudoris serraus de oi, martis 24 de gennargiu, de is seti, cuasi totus, e de is dexi cussus chi s’agatant in is autostradas. Su scioperu at a durai po duas dis e abarrant serraus finas is “self service”.
Ddu arregodant is organizatzionis Faib, Fegica e Figisc-Anisa cun d’unu documentu aunia, tra is atras cosas, benit scritu: “Su guvernu, invecias de oberri una mesa tunda po chistionai intru de nosu de is problemas mannus chi teneus, sighit a fueddai de trasparentzia e de zonas de umbra feti po atacai is responsabilidadis suas, lassendu cumprendiri, a sa genti chi sa curpa de su pretziu artu de is carburantis, ca sa curpa est sa nosta: no est aici, nosu non teneus curpas! Tocat a nai sa beridadi po torrai a oberri una mesa tunda”.
Ant abarrai obertus calencunu distribudori scioberaus in basi provinciali in manera de ponni in garanzia is servitzius minimus. Ant essi is prefetus a nai is distribudoris chi depint oberri. In is autostradas, invecias, decidint is Regionis chi depint garantiri unu distribudori obertu dogna centu chilometrus.
In is distribudoris girant duas locandinas, una cun is orarius de su scioperu, s’atra po fairi connosciri is arregionis de su morrungiu, depia a is “fueddus bregungiosus de su guvernu chi narat ca sa curpa de is pretzius artus est de totu sa categoria. Nos ant imboddiau de ludu a pustis chi su guvernu at decidiu de artziai su pretziu de is carburantis. Po ddu arregodai, totus depint sciri ca su godangiu nostu est sempiri de tres centesimus a litru, sia chi sa benzina costit unu euru a litru, sia chi tocat a fairi bessiri de sa buciaca dus euru a litru”.
Giorgia Meloni non torrat a palas e de Algeri difendit su guvernu: “Ddi eus pediu un’atobiu po duas bortas, su guvernu no at mai pensau a nai ca sa categoria de chini bendit carburantis est a faci de sola”.
Màuru Mura
Martis, su binticuatru de gennargiu de su 2023
Foto: https://www.adnkronos.com/sciopero-benzinai-sindacati-stop-25-e-26-gennaio-era-e-resta-confermato_NcgrQlPaN3YDgFIY9I2pw
