Non feti chini ddue trabagliat, ma chini e chi siat intrit in dd’una scola, o in un’universidadi, depit tenni su Green pass. Duncas finas is babbus e is mamas de is discientis.
Ddu narat su decretu, in pissu de sa paperi birdi, de su Consigliu de is ministrus chi obrigat totus cussus chi intrat in is Rsa a airi fatu su vacinu. Totu custu a partiri de su 10 de su mesi de talamini.
Est feti su cumentzu, poita giai de sa cida ch’intrat su guvernu iat podiri decidiri un’atra regula po atras atividadis, a partiri de is primas dis de su mesi ch’intrat, candu po cussu chi pensat su Comissariu Franciscu Figliolo s’80% de sa genti, cun prus de doxi annus, at esi vacinada.
Non benit postu a un’ala s’obrigu de su vacinu: “Est una pensada e ddue seus trabagliendu”, at nau su ministru a sa Saludi Robertu Speranza.
Su decretu decidiu de totu su Consigliu de is ministrus bit s’articulu, in pissu de atrus, chi narat: finas a su 31 de Nadale “totus cussus chi intrant in dd’una scola depit amostai su Green pass, foras de is discientis”. Chini non ddu amostat, non ddu tenit o non ddu pedit, erriscat una multa de 400 eurus.
Su decretu de is ministrus narat finas chi totu cussus chi trabagliant in is Rsa, non c’intrat chi trabagliant po siendas de foras, depit essiri vacinada: de su 10 de mesi de talamini e s’erriscat sa suspensioni de su trabagliu e de sa paga. Finas innoi a cumpudai depint essiri is dirigentis.
Imoi si pensat a obrigai a su vacinu totu cussus trabagliadoris chi funt a intru de cale chi siat logu: ristorantis, tzilleris, museus, cinemas e tiatrus, piscinas, palestras, ect…
At a serbiri? Chi pensaus chi su vacinu agiudat a binciri sa pesta si podit nai chena perunu problema ca su caminu est cussu: prus genti vacinada bolit nai erriscus prus piticus. Eus benni a biri, tocat a tenni fidi e spera!
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.open.online/2021/09/09/covid-19-green-pass-scuola-maestra-cacciata-bologna/
