“Deu e tui chi andaus a atobiai su mundu donendusì sa manu”. Narat aici su “post” postu de sa Presidenti de su Consigliu Giorgia Meloni, chi ndi fut torrendu de is Stadus Unidus, in sa pagina Facebook cosa sua. In sa fotografia, tirada in s’aparechiu po Roma issa e sa figlia Ginevra intu de mesu de is brassu sus. Sa Meloni, chi s’agataiat in America po un atobiu in sa Domu Arba cun su presidenti Joe Biden at decidiu de si portai cun sei finas sa pipia.
Ginevra est nascia de sa relata de sa Meloni cun su giornalista Andria Giambruno e at acumpangiau sa mama finas in s’urtimu G20 de Bali, in su mesi de Sant’Andria passau. Sa presentzia de sa pipiedda in su viagiu americanu iat airi spantau Biden, chi at nau, brullendu e gioghendu: “Poita non m’as avertiu? Ias airi aprontau po issa unu giru in sa Domu Arba”. Aprofitendu de custu spantu su Presidenti america etotu at contau sa pensada sua intru de sa familia: “Po babbu miu sa familia fut totu. Aunia totu cumentzat e totu si fraigat e totu acabat”.
Pensada craramenti cumpartziu de sa “meri” de Fradis D’Italia. De s’orrestu sa Presidenti italiana fut stetia crara in campagna eletorali, candu iat assegurau a su partidu e a is eletoris chi una borta bintu e diventada presidenti de su Guvernu nudda iat airi lassau “a sa relata cun figlia mia. Nosu feminas nosi scieus sempiri aprontai a totu”.
Ma non funt mancadas mancu is polemicas in is social. Funtzionat sempiri de aici. “Comenti pensais can di depu pesai a figlia mia”, at pregontau sa Meloni. “Tengiu su diritu – at aciuntu de fairi sa mama comenti dda pensu deu. Tengiu su diritu de trabagliai po custa Natzioni chena po custu privai Ginevra de una mama”.
Fueddus sabius, po totu sa genti de Fradis d’Italia. Ma forsis sa Meloni cussus fut cichendu…
Màuru Mura
Lunis su trintunu de triulas de su 2023
Foto: https://www.ansa.it/sito/notizie/politica/2023/07/29/meloni-sono-aperta-al-dialogo-sul-salario-minimo-ma-ho-dubbi-sulle-opposizioni_4a081928-976d-4a33-a2e2-e4275ad5734d.html
