“Cun sa veleta islamica non soi deu”. Sa giovana campiona de scacus iraniana, Sara Kadhem, fuia in Spagna a pustis airi pigau parti a un’atobiu internatzioniali de scacus chena s’“hijab” chi est un’bligu po is feminas de cussus logus, at contau sa beridadi sua a is giornalis e televisionis a pustis airi lassau s’Iran.

In d’una intervista donada, in d’unu logu chi non si depit connosciri po arregionis de seguresa, a su giornali spagnolu El Pais, sa picioca at torrau a biviri su contu de sa partida “incurpada”: “A s’atobiu de Almaty iari postu s’“hijab” feti chi ddue furint is telecameras, pota fui sa raprensentanti de s’Iran. Ma cun sa veleta non soi deu, non mi intendu beni, e duncas bogliu donai s’acabbu a custa situatzioni. E apu decidiu de non ddu bestiri prus”, at cumentzau a nai.

Chistionendu cun su giornalista, non at atacau nemancu s’arriolu po sa familia sua abarrada in Iran: “Sa spera mia est chi calencunu non si dda pighit cun issus, poita chi calencunu depit donai arrespustas a cussu chi est sussediu, soi feti deu e non issus, poita sa decisioni est feti sa mia”. Khadem, chi est lompia in Spagna a su cumentzu de gennargiu cun su pobiddu, su regista Ardeshir Ahmadai, e su figliu Sam, chi est nasciu dexi mesis a immoi, at spiegau de airi cumentzu a pensai de si nd’andai in logu strangiu sa matessi dì chi est nasciu su pipiu.

“Apu cumentzau a pensai a su benidori de su pipiu. Mi pragiat su pensamentu de bolliri biviri in d’unu logua aunia Sam podiat bessiri, chena perunu arriolu po nemus, e atras cosas chi immoi parint normalis ma po nosu non ddu funt po nuda. Sa Spagna mi est parta su scioberu meglius chi podiaus fairi”, at sighiu a nai. At, in segus, nau ca dd’iat a pragiri a sighiri de raprensentai s’Iran in is atobius de su giogu de is scachis e ca tenit in conca de diventai una “streamer online”, presentendu programas de scachis: “Dda tengiu in conca de paricius annus custa pensada, ma non ddu bolia fairi de s’Iran cun sa veleta”, at acabbau Khadem.

 

 

Màuru Mura

 

 

Martis, su binticuatru de gennargiu de su 2023

 

 

Foto: https://twitter.com/saraakhadem?lang=ar-x-fm