A pustis unu martis marigosu po is duas scuadras italianas, Milan e Juventus, in Champions League, eris est andada meglius po su Napoli e s’Inter. No est durci che meli ma abarrat durci su mercuris italianu de fubalu in sa massima espressioni po is scuadras de club.

Sighit a bolai su Napoli de Spalletti. Eris at otenniu sa vittoria de cuatru de sighiu in sa Champions e de fatu de airi bintu in Amsterdam cun s’aAiax cun d’unu arresurtau chi assimbigliat a unu set de tennis (1-6), s’est erripitiu in Napoli bincendu po 4-2. Duncas si podit nai ca su Napoli si nc’at papau is olandesus a s’andada e a sa torrada puru. Is gol de is asulus funt stetius de Lozano, Raspadori Kvaratskelia e Osimhen.

Gol cun emotzionis mannas finas in Barcellona aunia s’Inter at giogau una partida a faci oberta chena timiri. A su Camp Nou de Barcellona est acabbada 3-3. Paregiu chi po s’Inter est una prenda manna, ma non durci che meli comenti podiat essiri. Bataglia finas a s’urtimu. In su primu tempus passant in vantagiu is catalanus cun Dembelé. In su segundu tempus cumentzat su spetaculu de sa scuadra de Inzaghi. Pareggiu a su 51’ de Barella cun d’una grandu imbucada in area de rigore e unu tiru chi no at lassau scampu a su portieri. A pustis doixi minutus unu gol spantosu de Lautaro portat a innantis is nieddusasulus: sa bocia tocat prima unu palu in segus s’atru e dapoi intrat a intru. Su Barcellona non bolit perdiri e donat totu in campu e paregiat a pustis binti minutus cun su polacu Lewandowski, agiudau de una deviatzioni de Bastoni. Ma is emotzionis non funt acabbadas aici. S’Inter, difatis, torrat a segnai a su minute otantanoi cun Goesens. Parit acabada custa borta, ma a su 92’ lompit sa docia frida po is piciocus de Simone Inzaghi. Galu su polacu de su Barcellona ponit pagi po totus e fait su 3-3.

 

 

Màuru Mura

 

 

Giobia, su 13 de Santu Gaine de su 2022

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22

 

 

Foto: https://www.fanpage.it/sport/calcio/barcellona-inter-e-un-ottovolante-lewandowski-ammazzasogni-ma-il-3-3-avvicina-gli-ottavi/