“Apu tentu sa bona sorti, e galu mi parit finas oi, de atobiai, in is annus chi apu intregau a sa scola, Larenta Alagna. Non scia ca fut sa figlia de Mateu Messina Denaro poita non teniat su sangunau de su babbu, ma cussu de sa mama, Franca Alagna. No apu mai nau su fartzu de custa picioca, anzis dd’arremonu comenti de una picioca studiosa, sempiri atenta in classi, educada beni, forti e chi sciat eita boliat”.

Ddu contat Fabiana Cusumano, professoressa de italianu e latinu, in is scolas mannas, de sa figlia de su boss, acapiau lunis passau. Larenta, chi est sa sola figlia arreconnota de Messina Denaro, no at mai bistu su babbu de candu est nascia e at decidiu de no andai a ddu bisitai in presoni. Sa picioca bivit in Castelvetrano e un’annu e mesu a oi, su 14 de triulas de su 2021, at tentu unu pipiu. “Poita Larenta non mi bolit biri? Poita est inchieta cun mei?”, si pregontat su boss in calencunu de is paperis secuestraus in sa domu chi biviat in Campobello de Mazara.

“Apu torrau a nai – sighit sa professoressa – cussu chi issa etotu una borta m’at nau: ‘po bosatrus podit essiri unu cosa mala, po mei abarrat babbu miu’. Apu ligiu a intru de custus fueddus totu su dolu e su turmentu de una figlia cumpartzida intru de sa seguresa de essiri figlia de unu boss e s’amori chi dogna figliu tenit po su babbu, chena ponni in contu ca podit essiri unu cosa mala. No apu mai postu a un’ala Larenta, comenti non ddu apu fatu cun nemus de is discientis chi apu tentu. In classi issa fut bofia beni e castiada cun rispetu, comenti apu sempiri fatu cun totus”.

“In totu custu contu sciu beni ca fortzas prus mannas de Larenta si movint e si torrant a moviri. Chi aici non fut non si spiegaiant is trint’annus de bandidura. Chi dognunu iat fatu su doveri insoru non s’agataiat totu custus mortu chi oi funt che pantumas po is cuscentzias nostas. Soi professoressa de cuindixi annus e in classi apu sempiri fueddau de mafia e legalidadi, de su coragiu de nai sa beridadi e de non castiai de un’atra parti”, at acabau de nai sa Cusumano.

 

 

 

Màuru Mura

 

 

Lunis, su bintitres de gennargiu de su 2023

 

 

Foto:https://www.ilmessaggero.it/italia/matteo_messina_denaro_figlia_lorenza_alagna-7175541.html