“Non seus una Natzioni chi bocit is citadinus in is caminus”. Joe Biden acabbat de abarrai citiu e fueddat de cussu chi est sussediu in Minneapolis cun is mortis de Renee Good et Alex Pretti po mori de is agentis federalis. Is fueddus de su presidenti beciu de is Stadus Unidus, donant bogi a su disisperu de is americanus po sa manera de fairi po su disacatu de s’imigratzioni chi at fatu binciri a Trump e de su cali Kristi Noem est diventada sa faci. Est contras de sa ministra de s’aministratzioni Trump chi si dda pigant is democraticus: ponni a un’ala sa ministra o chi nde chi no cumentzant is paperis po s’”impeachment”.
Trump, po s’ora, mancu ascurtat e antzis at assegurau a Noem: “Abarrat aunia est: tengiu fidi manna in issa. Est fendu unu trabbagliu bonu de averas”. Trump cun sa ministra si funt atobiaus po duas oras in s’aposentu de cumandu de su presidenti, intur de su cali Trump etotu at amostau arriolu mannu. E po custu in Minneapolis est lompiu Tom Homan poita Gregory Bovino, su cumandanti de su Border Patrol at lassau sa citadi. Est a nai ca Trump est in duda po mudai ministrus, ca in s’aministratzioni a innantis non fut fiuau po nudda. E, difatis, a difendiri sa ministra – po cussu chi narat chini cumprendit – parit prus una difesa de su guvernu e non a tenni fidi.
In su fratempus, unu giuigi federali at stabiliu ca non podint essiri stupaus inderetura su pipiu de cinc’annus, acapiau in Minnesota, e nemancu su babbu, chi s’agatant impresonaus in Texas.
S’imagini de su pipiu acapiau, Liam Conejo Ramos, in is dis passadas est lompia apetotu in sa rete. Po is autoridadis su babbu de Liam fut unu foras de sa lei. S’abogau de sa familia at, invecias, fatu connosciri sa beridadi, est a nai ca s’omini fut aprontendu totu is paperis po cicai de essiri in regula.
