Feti unu fueddu at umperau, Alisandra Todde, sa candidada po presidenti de sa Regioni, po chistionai de is messagius de Perdu Pinna bessius a pigliu in is dis passadas. “Troglodita”, at nau eris in pissu de su palcu de su Tiatru Massimo de Casteddu. “Atru che brulla, comenti narat issu”, narat Alisandra Todde. Fueddus chi “scoviant a sa sola”, aciungit sa Todde, “est de importu mannu torrai a nai ca sa dignidadi de is feminas non tenint perunu pretziu”.

“No est chistioni de brullas – sighit a nai sa Todde – est chistioni, mascamenti, de arrespetu. Giai chi feus politiga, chi trabagliaus, chi teneus calencunu ruolu in sa sociedadi, una manera de fairi aici si podit nai feti cun dd’unu fueddu: trogloditas”.

Todde, in su palcu de su Massimo paris a Elly Schlein e Pieru Luisu Bersani, at finas chistionau de sa campagna eletorali chi est acabendu e de s’importu mannu de is logus chi funt a sa stesiada de is citadis: “Seus lompius in noranta logus. Is problemas de is sardus ddus eus ascurtaus non feti in is citadis, ma finas in is biddas piticas aunia bivit parti manna de sa genti. Candu chistionaus de sanidadi, trasportus, condinuidadi territoriali, trabagliu precariu e istrutzioni, fueddaus massimamenti a chini bivit in is comunidadis stagliadas de is servitzius. E sa Sardigna depit mudai finas po issus fendu in manera chi is logus atesu siant centralis finas in sa politiga sarda”.

Candu est lompia Elly Schlein, s’est amostada una truma de genti chi manifestaiant po is palestinesus chi ant aboginau totu paris “Palestina libera”. Sa segretaria de su Partidu Democratigu non s’est fuia e at chistionau cun issus, nendu: “Eus sempiri pediu de fairi citiri is armas, giai de su mesi de talamini passau e eus otentu chi sa Camera de is deputaus apat votau sa motzioni de su partidu chi eus presentau una pariga de dis a oi”.

 

 

Màuru Mura

 

 

Mercuris, su bintunu de friargiu de su 2024

 

 

Attività realizzata col contributo della Regione Sardegna – Imprentas 2023-2024.

Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://stream24.ilsole24ore.com/video/italia/sardegna-schlein-e-bersani-carbonia-sostenere-alessandra-todde/AFzA67mC