Su promotori de giustissia Alisandru Diddi at a cumentzai un’indagu nou po su sparessimentu de Emanuela, chi est mancada de domu sua, in Roma, in su mesi de làmpadas de su 1983, candu sa picioca teniat cuindix’annus. Is indagus nous lompint a pustis chi su fradi, Perdu Orlandi, at presentau istantzias medas.
Sa magistradura de su Vaticanu at a studiai is documentus de is indagus becius. Est de arregodai ca sa Procura de Roma iat postu in archiviu, in su 2015, totu cussu chi pertocaiat is casus de Emanuela Orlandi e de Mirella Gregori, sparessia custa puru in su 1983. A ddu archiviai fut stetiu su procuradori capu de sa procura de Roma, Giusepu Pignatone chi oi est presidenti de su Tribunali vaticanu. Perdu Orlandi tenit una spera: “Si podit lompiri a una solutzioni. Sa beridadi c’est, pensu chi siat de calencuna parti e personis medas dda connoscint”.
Po cussu chi iat nau s’abogau de sa familia Orlandi, Laura Sgrò, in su mesi de gennargiu de ocannu passau su Papa dd’iat scritu nendudeddi de chistionai cun su promotori de giustissia. E difatis s’abogau oi narat: “Est de un’annu chi boliaus essiri ascurtaus”.
Dis a innantis de Paschigedda passada est erribada fintzas sa proposta de lei po oberri una cumissioni de indagu de su Parlamentu.
Sa chistioni Orlandi fintzas s’agatat finas in is paginas de su libru de su segretariu de Joseph Ratzingher, monsignor Georg Gaenswein. In su libru, “Nient’altro che la verità”, su piscamu, in relata a unu documentu de su cali fueddat finas Perdu Orlandi, narat: “Custu documentu non est mai bessiu a campu poita no esistit”. Amitit, perou, de airi atobiau Perdu su 9 de mesi de Idas de su 2011 e poi spiegat poita, a pustis airi fueddau cun s’aposentu de sa stampa vaticana, tandu ghiada de Fideli Lombardi, non iat pediu a su Paba de tandu, Benedetto XVI, de intervenni in s’Angelus po fueddai de sa chistioni Orlandi.
Immoi s’at a lompiri a sa beridadi? Eus a biri…
Màuru Mura
Mercuris, s’undixi de gennargiu de su 2023
Foto: https://it.wikipedia.org/wiki/Sparizione_di_Emanuela_Orlandi
